豬年還有兩日才開市，股民為新一年做投資部署前，不妨聽聽兩位堪輿學家沈大師和麥玲玲，如何從玄學點評豬年的投資運勢，以及股樓金滙的走勢變化。
【股市篇】沈大師︰上半年反覆 8月轉升
去年立春（2018年2月4日）後，恒指由歷史高位三萬三轉勢下跌，觸發小型股災。前車何鑑，訊匯證券行政總裁沈振盈都說，今年特別多人留意立春是否又是轉勢日，而今年立春碰巧是年三十，只得半日市，微升59點，收報27,990點，未能升破28,000點。沈大師推算真正轉勢會過農曆年假後，即初四開市日。
沈大師用立春的八字推算，今年股市有兩個局︰「財多身弱」及「食傷生財」，「我傾向股市上半年會反覆震盪，特別係第一季股市會向下沉底，新曆5、6、7月就會反覆，去到8月先開始有升浪出嚟，下半年表現會好啲。」
他指今年雖然財星好強，但由於底子弱，要幾經波折才會有成果，「經濟本身唔得，表面出現一啲小陽春現象，但實質底子太差，喺經濟數據上仍睇唔到令人鼓舞嘅前景。」他估計下半年股市好轉亦因政策上的轉變刺激觸發，有機會是中國貨幣政策改變，因而吸引全球資金流入中港股票市場，而這一波升幅有機會持續至2020年第一季。
股票版塊方面，沈大師指下半年的八字以「金水用神」，屬水行業大旺，如零售、內需、出口、貿易、航運，將會變得強勢，「屬水行業強，反映中美貿易戰有機會拖至8月8日後可完全解決，行業開始好轉順暢。」
屬金行業亦會受惠，沈大師指可留意保險股，但銀行股就要有耐性一點，因銀行業仍有負面因素未消除，還看今年首兩季銀行業績好壞才能下定論。
至於最多人關心的騰訊（700），沈大師指屬火行業的財運都強勁，手機孖寶舜宇光學（02382）及瑞聲科技（2018）、5G、電訊、電腦行業股都可以留意；惟騰訊還看公佈首季業績後，股價會否到底才決定，「首季業績後我估會拖到騰訊股價幾低嘅，跌得低又唔怕買，220至200蚊嘅位，就一定唔怕買。」
沈大師豬年建議︰「絕處逢生，物極必反，好大嘅轉變會係豬年出現，投資者要繼續手持現金，等大市出現恐慌性下跌後先入市，重點仍係屬金水板塊。」
【股市篇】麥玲玲︰今年短炒好好炒
講到今年股市，不少人擔心今年己亥年，股市會否比狗年戊戌年更差，麥玲玲表示，「今年情況唔係咁悲觀，因為上年戊戌年火土太重，股票唔會好，而且戊戌年立春八字真係冇財星。不過到己亥年，水旺，香港行金水運都唔差，第二立春八字有財星，而且係偏財星。」
她表示，己亥年立春八字火旺，估計今年股市炒賣活躍，「第一唔係行單邊，上年點玩都係輸，今年係有贏有輸，上落幅度大，係一個好炒嘅年份，如果你眼明手快係賺到錢。」她提醒，今年短炒較炒長線易有勝算。
她預期，港股今年整體波動較大，但走勢不過不失，其中農曆九月至十月是全年經濟走勢最穩健的月份，市場投資氣氛樂觀，外圍有利好消息帶動，整體交投比早前活躍。不過，全年要特別小心正月、農曆四月、農曆七月；其中農曆四月，火土重，市場受悲觀情緒籠罩；至於農曆七月強烈受沖，風險亦會較高。
板塊方面，立春八字金、水重，有利銀行業增長，但更嚴格的監管，對銀行帶來一定制肘；另外，物流、旅遊、基建股亦有不俗表現。至於屬木的行業偏弱，較易受衝擊，如傳統紙媒、環保股。
科技股方面，科技屬火，會面臨衝擊，市場汰弱留強，部分或會被市場淘汰。另外，流年八白財星飛臨中宮，象徵受到囚禁，「即係成個財星畀人拉咗，今年成個市場炒賣係活躍，但拎唔拎到啲錢走呢？要去到2020年，財星出囚，咁就鬆動啲。」
麥玲玲豬年建議︰偏財運旺，賺快錢機會多，但市場大上大落，投資者要有糊就食，見好即收，尤其上半年更要謹慎行事。
【金滙篇】沈大師︰美元下跌 金價向好
豬年二黑位對美國不利，沈大師估計美元第一季或會見反彈，然後就會反覆向下走，展開大跌浪。由於美元下跌，黃金及外幣都會變好，「今年除了要留意黃金，亦要留意外幣，最旺地方係西北，即係英國、歐洲，尤其英鎊係重點，值得留意，日圓都會不錯。」
至於金價，沈大師看好今年可升至每盎斯1,400美元，因為假如貨幣政策有變，金價便有上升空間，而假如全球經濟下行，黃金又有避險作用，「金今年係『用神』，我覺得金價係1,160美元已抄咗底，未來一兩年會反覆向上，今年未必上得高，估計可到1,400美元。」
【金滙篇】麥玲玲︰特朗普個人清醒返 貿易談判有進展
人民幣方面，她認為不宜睇得太淡，因為豬年四綠文昌星飛正北，「分分鐘一個屈尾十佢又反彈。」今年中國、日本經濟料會不俗，反而歐美仍多爭端，或會重新洗牌。金價方面，料上半年走勢平穩，但至農曆六、七月，會迎來一段升勢。
提到貿易戰，她表示，歷史不斷循環，對上兩個己亥年，即1899年，美國提出門戶開放政策，「夾硬拎嘢入來畀你賣，大家瓜分利益，同樣今年各國喺貿易戰上，會達成一啲協議，打開一啲窗口。」加上，過往「9」字尾年份，一般變化都較大，或者有重大突破；再者，觀乎特朗普八字，她今年離開本命年，「今年行返水運，個人通咗，理論上決斷會英明咗。」她預期，今年各國就貿易議題上，問題雖未能即時解決，但關係未必會如去年般緊張，情況有好轉。
記者：倪敏慧、鍾耀恆
whatsapp sticker
快啲嚟下載果籽新春〈豬年貼籽-多豬慎入〉WhatsApp Stickers｜bit.ly/AppleseedSticker
10萬蚊 30人分！《動腦Q》新春Q多寶
年三十至初三 3:15pm、10:30pm
豬年動腦，Q多啲money！
http://bit.ly/2Ul8W3t
| | | |
|
鍾意就快D Share啦！
|
|
|