現正播放嘅《皓鑭傳》，莫講話香港，連內地成績都不如理想，想再現《延禧攻略》嘅成功已無可能，到底問題出喺邊呢？似乎係因為製作人于正嘅爽快劇集方法論唔work。
諗返《延禧》嘅爽快，由魏瓔珞被欺負到反將對手一軍，其他劇要用兩、三集先講完，但《延禧》集中喺一集內完成，而且做足起承轉合環環相扣。
反觀《皓鑭傳》，短短頭兩集，李皓鑭就已經歷被繼母謀殺、阿媽被殺、被未婚夫同妹妹背叛、被父親遺棄，連契媽都被燒死等等慘況。節奏上快就夠晒快喇，但觀眾睇得一啲都唔爽，剩係知道女主角被害得好慘，因為無連貫嘅事件去推動劇情，誇張到上一個鏡頭見到李皓鑭被拋落水企圖浸死，下一個鏡頭佢已經換好衫準備返屋企救阿媽，中間無晒起承轉合，搞到鏡頭切換生硬之餘，亦令觀眾一頭霧水要自行靠估，咁樣點會唔趕客？
今時今日娛樂選擇咁多，「黃金七分鐘，生死前三集」已經係影視界嘅標準，于正深諳此道，炮製咗情節爽快嘅《延禧》，但《皓鑭傳》快過頭反而忽略咗情節，令唔少內容變成廢戲。
來源 source: http://nextplus.nextmedia.com
|
鍾意就快D Share啦！
|
|
|