苟芸慧同老公陸漢洋結婚就快半年，都差唔多時候考慮生小朋友喇，而近日苟姑娘出席完有好多小朋友參與嘅慈善活動之後，都坦言努力造人中，但就唔想有壓力。啱呀！欲速，則不達。日間同老公四圍去拍拖輕鬆吓，夜晚先有好心情造人㗎嘛。
早前苟芸慧兩公婆一齊出街，但就分道揚鑣，各有各「玩」。男士們一向鍾意電子產品，陸漢洋都唔例外，一支公去咗蘋果研究手機，仲捉住藍精靈問長問短，勁投入。另一邊廂，一向有氣質嘅苟姑娘當然去行書局啦，成個氛圍同格局都同佢好襯呀。
Enjoy完私人時間，佢哋兩公婆就會合開餐。雖然男方不時講電話，但一傾完就會主動同老婆交頭接耳，唔會冷落咗苟姑娘，亦唔會話經常見面搞到無晒話題。
結咗婚，兩公婆齊上齊落形影不離當然好啦，但有時能夠給予對方足夠私人空間都好緊要。各自抖吓氣，到再會合嘅時候，反而更輕鬆自在唔會形成壓力，好似苟姑娘咁，放假出街都可以各行各。佢哋嘅日常婚姻生活能夠如此自在無壓力，相信造人成功都係遲早嘅事。
BTW，苟姑娘淡妝接近素顏，睇落皮膚依然好好，樣都好靚，真係好羨慕陸漢洋。
來源 source: http://nextplus.nextmedia.com
|
鍾意就快D Share啦！
|
|
|
