現年53歲的李麗珍與著名填詞人潘源良愛恨糾纏30年，潘源良2016年的一句：「我要走！」兩人第四度分手，男方去年9月閃娶女友Rita，與珍妹緣盡。珍妹日前接受專訪，她直言曾希望與對方復合：「戇居居喺度等，但最後原來佢都係唔要我。」潘源良昨日回應道：「不如相忘於江湖。」
相關新聞：好友猝逝頓悟：我要企番起身
年過50的李麗珍，依然經歷失戀，前半生依附愛情，換來遍體鱗傷：「再唔走番出嚟就係等死，唔想死，唔想令粉絲、家人、朋友失望，我一定要令佢哋為我鼓掌。」53歲，珍妹堅決不再糊塗，重新振作開始，亦因此有勇氣首度剖白這兩年的失落重創。
珍妹以為長相廝守，最後潘源良離她而去。「因為都係最長嘅一段，我都感覺到佢係對我好好，諗住呢個係好難分開。直到有一日真係分開，我就戇居居喺度等，以為佢會返轉頭，可以再喺番埋一齊，或者大家可以有啲乜嘢改變，但最後原來佢都係唔要我。」
2016年的一天，潘源良一句：「我要走！」三度復合的十年關係，從此一刀斷。但當下的珍妹，仍寄望有第四度復合。「有㗎！因為曾經分開過兩次，今次係第三次，可能變成一個習慣咁樣，但我已經等咗兩年，而呢兩年情緒都極度低落。」旁人曾跟珍妹說，他身邊早已存在另一個她。不過人到最痛時，才學會面對、接受、放手、尋回自己。
| | | |
放下對方療情傷
那兩年，珍妹在加拿大治療情傷，潘源良在加拿大再婚。「當時同個女一齊睇到呢段新聞，我同個女對望，唔敢做乜特別反應，當時的確係空白一片。然後就開始鑽牛角尖，點解會咁樣呢？一定係我唔夠好，但有乜唔夠好呢？又諗唔到喎！惟有覺得係緣盡，上天又畀多一次考驗我。
「好儍，之前每次講起都會爆喊，我都食咗兩年情緒藥，直至佢搵到幸福快樂，我開始冇再食藥，覺得就算再食都冇用。」放下對方，原來是珍妹最好療效。
有緣無份，總留下遺憾。「之前有諗過再婚，不過時間唔啱。對方希望嘅時候我未準備好，到我開始覺得穩定，阿女都差唔多畢業，我自己都可以喺加拿大安定落嚟。不過呢啲都已經過去咗，我都唔係好想再講，今次係第一次講，亦都係最後一次。」重新振作，珍妹才看清昔日的一塌糊塗。「睇番轉頭會覺得自己好儍，覺得應該要長大。」
女神的夢醒時分
珍妹續說：「每一次我都係俾人飛，你咪睇我好似好惡死，其實好多時係對方提出，我都渴望有一段好長，好安定嘅感情生活。」再儍的女神，終有夢醒時分。「我以後都唔要喊，要笑。我覺得今次經歷係令我變好，只要自己走番出嚟，就會有好多朋友等緊我。以前唔夠努力，惟有𠵱家追趕番，起碼要追番之前情緒低落嗰兩年，再追番之前未做好嘅事情。」珍妹還相信真愛嗎？「我都仲有個期望，仍然相信真愛。不過年紀越嚟越大，未必好似以前咁多人追求啩！不過仍然希望有人愛錫，所以我對將來仍然充滿希望。」
珍妹昨日以短訊回應《蘋果》：「暫時不想講太多，等遲少少好嗎？唔好意思。」而潘源良則以《莊子．內篇．大宗師》一句回應：「相濡以沫，不如相忘於江湖……」
採訪：Sukey、何永寧
攝影：Lawrence Wan
場地提供：MioXPace
化妝：Ling Ng
髮型：Daniel Cheng@mini g salon
|
鍾意就快D Share啦！
|
|
|