今時今日睇旅遊節目，唔使再打開電視睇埋啲咩都話好食、好味、好正嘅介紹㗎喇，只要上網撳幾個制，大把YouTuber拍片分享，咩種類咩形式嘅介紹方式都有，真係豐儉由人，連已上神枱嘅歌手古巨基都唔執輸玩埋一份，伙拍森美嚟咗個《亂世兄弟旅行團》，去到東京便利店挑選素材，再發揮創意製作成新料理俾對方品嚐，過程真係相當好笑。
話明係創意料理，加上兩位都唔係咩廚藝高手，出嚟成品當然會有伏味啦，特別係森美呀，份人咁搞鬼，作品都一樣，例如佢整咗個「咖哩布甸麵」，將甜品布甸攪爛再撈入咖哩味杯麵之中，齋諗都知道呢個組合嘅味道唔多掂，點知森美仲插多三條魚喺頂，睇落十足拜神貢品咁，古巨基見到都大呻：「係咪玩鬼我呀！」
到真係試味時，古巨基只係將啖麵擺落口，都未咬未吞，就已經揦埋口面想嘔咁款，森美仲好意思笑騎騎咁問：「係咪好食呀？」古巨基擰晒頭答：「唔多好食！」森美唔信，仲拖埋工作人員落水試食，工作人員一擺落口就噴返出嚟，味道可想而知。
森美俾古巨基「品嚐」嘅伏，陸續有嚟！一味fusion甜品「朱古力香梅芝士凍」，食到古巨基唔只想嘔，仲惡啃到標埋眼水添呀！森美唔信真係咁難食，一於自己試下，點知佢都話：「有股臭腳味，好難食。」之後更逼迫工作人員「分甘同味」，難食到人哋聲都變埋。工作人員咁大犧牲，加人工都唔夠，應該仲要買重保險添呀！
來源 source: http://nextplus.nextmedia.com
|
鍾意就快D Share啦！
|
|
|
