亞視近年「立立亂」，但其實都曾經風光過。
麥翠嫻–83年畢業於亞視第一屆藝訓班，同屆藝人還有黃秋生、苑瓊丹、吳毅將、吳剛等。這位史前花旦麥翠嫻，其實亦曾經是亞視老闆、已故邱德根先生的愛將，一出道便有機會擔正做女主角，與李影、禢素霞、魏秋樺、蔡瓊輝、馬敏兒、葉玉萍、和蔡倩兒合作演出電視劇《八美圖》，又陪老闆獻花給前美國總統Jimmy Carter（卡特）伉儷。
憶起往事，麥翠嫻都一臉自豪說：「咁多朝，得邱生係有盈餘，當年真係自己帶廁紙同筆返工，因為規定每日用四格廁紙，筆要用完攞番舊嗰支筆芯去換。以前大家覺得佢好孤寒，其實佢好前衞，響應環保，睇到好多嘢。記得以前台慶，邱生會派每人一封遠東銀行嘅5蚊利是券，但開戶係要10蚊，哈哈，佢思維就係要你唔准懶，唔勤力就會嘥咗5蚊，員工亦好醒，集腋成裘開一個戶口攞錢。但邱生就好睇得起我，專登叫『翠嫻翠嫻』，跟住就喺西裝暗格拎咗一封利是，原來係300蚊現金利是，我拎住封利是都好感動。」
每個年代都有挖角潮，90年代翠嫻亦曾經被無綫挖角，過檔後第一部演出的劇集，便與藍潔瑛和商天娥合演《摘星的女人》。直至90年代尾，翠嫻毅然離開娛樂圈，與商人龔汝華結婚，並育有一女一子。她說：「當年冇唔捨得，唔同階段就做唔同嘅嘢，結婚後就要家庭行先，要對小朋友負責任，由佢哋幼稚園、小學、中學我都follow住。」
現在大女Vicci已經22歲，大學畢業，而21歲細仔Katio則在瑞士讀酒店管理，最近返香港實習。見大女Vicci長得亭亭玉立，問可會入行做「星二代」？翠嫻說：「佢哋都有音樂同藝術細胞，阿女讀中學嗰陣已經有參加校內嘅choir，同女拔比賽贏過一次。佢仲參加過『Opera HK青少年團』，即係莫華倫嗰個，又同羅馬劇院有合作演出。但現在大個咗，佢鍾意金融管理，入咗ibank。而阿仔就讀酒店管理，佢哋都係想專注自己嘅工作多啲。」
麥翠嫻夫婦雖曾經歷過生意失敗，但近年已東山再起。翠嫻稱小時候家貧，甚麼苦都捱過：「我有四兄弟姊妹，我讀幼稚園已經要孭住最細嘅細佬一齊返學，人哋睇就好易，我仲要幫屋企做家頭細務，同做手作仔賺錢。煮飯、換燈、電視駁線、木工乜都難唔到我㗎。」
她與丈夫龔汝華結婚逾20年，仍然好恩愛，如今仔大女大，麥翠嫻除了幫丈夫管理鐘錶生意外，幾年前還復出登台、拍港台劇和參演舞台劇。當中與一班舊亞視之友小強甄志強、王薇、傅晉杰、十一哥何國材等合作的音樂劇《難兄難弟》早前公演，她笑言阿女工作太忙，都沒時間幫手，她說：「其實裏面有個角色，需要一個少女唱musical，但佢都係忙啲。」她早前亦有演出港台劇《運輸背後》，自言過足戲癮，她說：「因為故事好人性化，講我老公係考牌官，原來都要面對好多問題。收視？唔介意，做藝人無論有幾多觀眾支持你，都要做好呢份工。」
採訪﹕嵐山
攝影﹕沈健程
場地提供﹕嘉力斯鐘錶公司
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb
| 麥翠嫻的大女Vicci已大學畢業，樣子似足媽咪，但卻無意入娛樂圈。(受訪者提供/資料圖片) | | |
| | | |
| | | |
| | | |
| |
|
鍾意就快D Share啦！
|
|
|