《福爾摩師奶》啱啱播出一星期，明明頭兩集節奏都OK，劇情尚算吸引，起碼追查兇案線索時，接二連三有更多伏線，例如點解呢頭黃智賢見完煙鬼榮，下一秒煙鬼榮就瓜柴，未免太巧合，係邊個暗地裡一直搞事呢？
觀眾期待劇情喺追查開膛手、搵菲臘費查嘅主線上，繼續出現謎團，並一個個逐步破解，直到最後真相大白。點知，第三集開始，無聊情節開始加插，變咗好似「貴婦落難記」或者「香廬居民之日常」咁，睇睇陳松伶痾唔出屎，又睇吓陳煒點樣收租等等。雖然有啲位都搞鬼嘅，好似「老公大力啲，唔夠呀！」原來係兩公婆匿喺房䟴竹昇麵，真係俾佢fake晒。不過，咁樣拖戲法，好悶喎！
仲有仲有！江嘉敏、陳瀅同余德丞，相信往後劇情都有佢哋嘅存在價值，但截至現時為止，佢哋負責嘅情節都係無關痛癢、可有可無，點睇都只係拖戲，唔覺同主線有關喎！明白TVB要捧年輕一輩上位，等佢哋多啲曝光，但太多「廢戲」觀眾反而唔受落，甚至逼人棄劇。如果唔係難得有松松姐姐，加上杜大偉呢個半唐番夠突出，真係直接等大結局睇結果更加快靚正。
來源 source: http://nextplus.nextmedia.com
|
鍾意就快D Share啦！
|
|
|