電影《G殺》是一齣台前幕後均由年輕人主導的純港產懸疑片，是導演李卓斌操刀的首部長片，找來陳漢娜、林善、黃璐等新演員擔正，並獲第38屆香港電影金像獎最佳女配角、新演員及新晉導演等提名，從充滿暴力、色情及血腥的預告片中，已感到此片Cult味十足，觸及師生戀、校園欺凌、黑警、性工作者和新移民等大量社會問題，其中飾演陳漢娜（Hana）爸爸兼黑警龍爺一角的杜汶澤，日前在九龍塘接受《蘋果》訪問時直言，現在是最差的時代，但卻產生了最好的演員。
電影題材和社會脈搏從來都息息相關，那怕你高呼討厭政治，但有時候討厭的事會自動找上門，不管你在任何崗位，阿澤表示：「我夠膽講，我哋電影圈以前嘅新人個個都係戇XX，唔識做戲不特止，係乜X都唔識，出面賣緊幾錢個飯盒唔知，社會發生緊咩事佢又唔知，就算有啲做咗老竇生咗個仔又點？一樣咩都唔識戇XX。」相比下，阿澤認為新一代演員的誕生更可貴：「我好欣賞呢一代嘅新人，唔單止呢套戲嗰班，另外吳肇軒、游學修、余香凝同廖子妤佢哋同以前新人好唔同，跟時代脈搏好貼近，知道個社會發生緊咩事，好有良知。」
諷刺的是在最差的環境下，卻造就出一群阿澤口中的好演員，他說：「首先我覺得教育係關事，雖然自己受教育唔多，但我仍然相信教育幫到呢班後生仔，其次應該係社會形勢令佢哋被迫認識同關心更多嘅嘢，因為你唔攪個社會，個社會都會嚟攪你，呢班演員係環境因素形成，以前嗰輩覺得好似入到行就一定發到達咁，未識做戲就識擺款、多多要求，但而家個電影市道咁差，大家越來越懂得珍惜眼前機會，係環境造就咗咁多有質素嘅新演員，所以有啲人話最好的時代同最差的時代可能就係而家。」
除電影圈外，現今香港何嘗不是經歷最壞和最好的年代？阿澤同意：「有人話香港好撕裂、好悲哀，我覺得唔係，如果團結嘅基礎唔穩健，咁就算咩真正團結呢？真正文明社會應該係每個人都有獨立思考能力，大家意見唔啱因為每個人都有唔同思想㗎嘛。比較以前而家好好多，雖然唔係太和諧，但每個人認知度係高咗，起碼以前無選擇，TVB播咩你都要睇，但而家唔會，其實所有嘢都係息息相關，有咁嘅社會先培育到咁嘅演員。」
吸引阿澤答應演出的原因，他笑言原因只有兩個：「首先係因為陳漢娜，佢上一套《殺破狼‧貪狼》係古天樂做佢老竇，今次到我做佢老竇，突然間覺得自己同古天樂變咗同一個Level。第二就係做黑警，我睇完個劇本如果佢搵第二個人去做黑警呢個角色我會嬲，冇人會好似我咁了解黑警，我係香港黑警研究科科長，所以甚麼『劇本角色吸引』嗰啲全部都呃X人嘅。」近年不少年輕人覺得逢警必黑，阿澤認為﹕「咁又唔係逢警必黑，但未至於去到要表揚囉。」
整套電影及拍攝團隊中，除出品人邱禮濤外，阿澤是年紀最大的一位，他形容是一個完全反叛的團隊，電影寫實地反映出年輕一輩的失落及無助，阿澤又認為現今年輕人應該何去何從？他說：「我作為老嘢夠膽講，最唔應該就係對年青人指指點點，佢哋唔使你勉勵，總之唔好咁多嘢講就得㗎喇，唔該唔好以過來人去分享經驗，最叻係你啦，我都後生過，好知道當時自己想點。」
即使在團隊中最富經驗，阿澤依然拒絕分享，原來跟自身經歷有關：「我最憎就係喺片場撞到啲老嘢，講到好似為你好咁，要教精你塞錢入你袋，如果你教我嘅嘢令到我好，咁嗰樣嘢唔係屬於我，我做錯咗都係我自己去承受先有機會去改進，所以作為老嘢呢個『教』字真係難聽過粗口。」事實上類似的說話，又何只在片場出現。
既然是演員身份，拍攝時阿澤話只會做演員本份：「未到我埋位就行埋一、二邊等，等得太耐我就會行去X佢點解咁耐都未到我，呢個咪係演員嘅本份啦。」即使演員間，阿澤話亦不會過份和對手研究及討論角色：「拍戲咁多年最欣賞就係梁朝偉，佢唔會同你有多餘嘅研究同交流，唔會教你又唔會提點你，到演嘅時候佢就會帶到你入戲又畀到空間你，的確我喺佢身上係學到好多嘢，至於嗰啲教過我做戲嘅人，喺佢哋身上學到嘅就係記得以後唔好教人。」
講到對這群新一代演員推崇備至，然而阿澤自己稱暫無意再開戲，但對於近年再度湧現一套套純港產電影，而且口碑和票房成績均有目共睹，阿澤表示樂見這現象：「其實更加應該係咁，分分鐘港產片開戲多過大陸，事實係大陸有咩戲開啫而家？成日有啲人用舊聞當新聞，仲以為大陸好多錢搵，事實上邊有錢搵呀，上面靜過太空，開戲？交咗稅先講啦。」
化妝：Connie Lai
精選娛聞，喺晒《娛果》
http://fb.com/appledailyent
第二屆最港電影大獎投票網址
https://bit.ly/thekongestfilmawards2018
3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb
|
鍾意就快D Share啦！
|
|
|
