剛於上月榮升爸爸的藝人鄭嘉穎今晚出席活動，笑言第一次入產房陪太太陳凱琳（Grace）生產嘅畫面仍歷歷在目：「成個過程好興奮好輕鬆，麻醉師係馬來西亞人，佢播好輕鬆嘅音樂，令我哋好放鬆，但剪臍帶時估唔到咁韌，要用力先剪到，見到BB出世嗰刻，好自然眼濕濕，同Grace都好開心，因為BB好健康。」
愈大愈似媽媽
問到囝囝似邊個？嘉穎表示：「我媽咪話似我，但自己覺得愈大愈似Grace，囝囝係奀皮仔，我叫佢做皇上，因為佢要咩就要即刻要，最高紀錄一日換17條片！佢咩都要快，唔係好有耐性，有時仲喊，我話佢啲戲好假。（你係淡定爸爸？）唔係，沖涼都要睇陪月沖幾次先夠膽幫佢沖，因為佢所有嘢好急，換片方面我就好快可以幫佢。（佢「敬荼」畀你？）冇，我一除條片，就用手遮佢重要部位，依家五個人睇住佢，佢乖嘅時候個個爭住抱。」
陪緊太太坐月
嘉穎仲話依家陪緊太太坐月：「呢個月過得好充實，嚟緊要出番嚟工作，檔期好密。（太太上圍升級，你好滿意？）嘩，唔好咁講，太太點我都滿意嘅。（獎勵佢乜嘢？）太太諗緊，揀緊，由佢揀！」講到日前Grace未坐滿月就出關，會唔會覺得佢好曳？佢就開口護妻：「唔好咁講，尊重佢決定，自己有講自己睇法佢聽，梗係希望佢成個月都養好身體，不過夫妻要互相尊重，學外父講，大事我決定，小事太太決定，不過其實大小事都係佢決定。」
----------------------------
東網巨星開咗ig喇，大家快啲follow
https://bit.ly/2JjSVcr
來源 source: http://hk.on.cc
|
鍾意就快D Share啦！
|
|
|
