「這是最美好的時候，也是最惡劣的時候。」放於電影圈亦然，電影題材跟社會脈搏息息相關。政治未必不關你事，燈油火蠟柴米油鹽，種種都是政治、政策的副產品。杜汶澤認為時代雖壞，但未至於一無可取，至少令新一代演員覺醒，不再像以前新人般蒙蒙混混乜都唔識，飯盒賣幾錢都未必知，他說：「新一代演員有社會良知。」
撰文：曹家誠
攝影：陳慧安
杜汶澤參演的新片《G殺》被指cult，事實上觸及的社會議題亦廣，師生戀、校園欺凌、黑警、性工作者及新移民，阿澤在片中演黑警，早前他在九龍塘接受訪問，認為電影題材和社會脈搏從來都有關連，那怕你高呼討厭政治，但偏偏越討厭的事越會找上你，電影人也不能置身事外。
相關新聞：搵第二個做黑警會嬲
社會造就
阿澤說：「我夠膽講，我哋電影圈以前嘅新人個個都係戇XX，唔識做戲不特止，係乜X都唔識，出面賣緊幾錢個飯盒唔知，社會發生緊乜事佢又唔知，就算有啲做咗老竇生咗個仔又點？一樣乜都唔識戇XX。」相比下，他認為現今一代的新人目睹社會轉變，在歷練下成長，見識跟以前的新人不可同日而語：「我好欣賞呢一代嘅新人，唔單止呢套戲嗰班，另外吳肇軒、游學修、余香凝同廖子妤，佢哋同以前新人好唔同，跟時代脈搏好貼近，知道個社會發生緊乜事，好有良知。」
諷刺的是在最差的環境下，卻造就出一班阿澤口中的好演員，他說：「首先我覺得教育係關事，其次應該係社會形勢令佢哋被迫認識同關心更多嘅嘢，因為你唔搞個社會，個社會都會嚟搞你，呢班演員係環境因素形成。以前嗰輩覺得好似入到行就一定發到達咁，未識做戲就識擺款、多多要求，但𠵱家個電影市道咁差，大家越來越懂得珍惜眼前機會，係環境造就咗咁多有質素嘅新演員，所以有啲人話最好的時代同最差的時代可能就係𠵱家。」
唔使勉勵
除電影圈外，現今香港何嘗不是經歷最壞和最好的年代？阿澤同意：「有人話香港好撕裂、好悲哀，我覺得唔係，如果團結嘅基礎唔穩健，咁算乜嘢真正團結呢？真正文明社會應該係每個人都有獨立思考能力，大家意見唔啱因為每個人都有唔同思想。比較以前，𠵱家好好多，雖然唔係太和諧，但每個人認知度係高咗，起碼以前冇選擇，TVB播乜你都要睇，但𠵱家唔會，其實所有嘢都係息息相關，有咁嘅社會先培育到咁嘅演員。」
電影中年輕一輩失落及無助，對現今年輕人應該何去何從，阿澤認為：「我作為老嘢夠膽講，最唔應該就係對年輕人指指點點，佢哋唔使你勉勵，總之唔好咁多嘢講就得㗎喇。」
化妝：Connie Lai
|
鍾意就快D Share啦！
|
|
|
