縱橫娛樂圈47年、現年60歲的「靚聲王」關菊英，憑劇集《溏心風暴》「細契」一角兼金曲《講不出聲》再創事業高峰。自從去年跟《溏心》班底公演舞台劇《秘密》後，一直深居簡出，與其口中「機靈、心地好」、相交逾10年的密友周偉利更是相處愉快，最近一次公開演出已是去年12月，跟陳展鵬及胡諾言在吉隆坡雲頂開演唱會。她曾透露完成舞台劇後會暫停拍劇，享受人生，但近日有讀者爆料聲稱去年底常目擊她出入醫院，更指她曾抽取骨髓作檢驗，故非常擔心其健康。
有嘢超標：正式學名我都唔識講
記者隨即聯絡關菊英求證，對於被指出入醫院及抽取骨髓，當時身在外地旅行的她聞言即大方承認：「因為發覺有少少問題，所以去驗身。醫生話我其中一樣嘢係超標，所以去抽骨髓驗吓，出嚟結果係冇乜大問題。（係乜嘢超標？）呢啲係我個人私隱，唔想講喇！正式嘅學名我都唔識講出嚟！我又唔想講出嚟嚇親屋企人，大家放心，我行得走得，依家又去緊旅行，多謝大家關心。」
強調「行得走得」的關菊英雖然行蹤低調，但無論精神、健康的確未見太大異樣。上月20日，東網就發現她與密友周偉利從跑馬地住所出發到金鐘。期間，周偉利先行落車到個人護理產品店購物，而安坐車中的關菊英則一臉悠然玩電話，甫見記者更除下口罩，友善揮手。未幾，周偉利拿着戰利品急步上車，見記者時仍面露笑容。
步履輕盈 周偉利貼身護花
兩人乘車到中環，並步行到診所林立的大廈睇醫生，沿途面對記者的提問，包括是否身體不適、常出入醫院等問題，戴口罩的關菊英依然氣定神閒，與周偉利一樣有默契地面露微笑，惟未作回應。周偉利盡顯「機靈」，刻意行前護花，相當貼心！當記者祝福身體健康時，關菊英立刻點頭兼報以微笑，步履輕盈踏入大廈，保安見狀立即主動上前護駕。
曾揚言現在過半退休生活、閒時與親朋相聚或去旅行的關菊英，雖然常與周偉利有影皆雙，但並非經常糖黐豆。孖咇到中環睇醫生前兩日，周偉利單獨外出到九龍與友人飯敍，全程未見菊姐。
其實追求簡單生活的關菊英，生活充實又着重養生，曾透露每日要步行至少一小時外，還會做Gym、玩瑜伽及學跳拉丁舞，飲食亦以清淡為主，包括喝大量水及食大量蔬果，難怪已「登六」的她駐顏有術，樣貌及身材都未有走樣！
|
鍾意就快D Share啦！
|
|
|