11歲做學徒，在夜校讀到初中就輟學，在銀幕上扮演大俠和大佬的狄龍，誰會想到學歷不高的他，銀幕下卻是一位出口成文的智者。
出身邵氏武打影星的狄龍，日前在土瓜灣接受《蘋果》專訪，現73歲的他仍腰板挺直，說話鏗鏘；回首前半生，雖然小時候家裏很窮，但狄龍說：「而家諗番起，就係『千金難買少年窮，萬金難買老來瘦。』人生就係咁，冇經過當初嘅苦、當初嘅窮，當初嘅掙扎、當初嘅被詆毀、被看輕，你唔會有今日嘅奮力上進。細個時候有啲叔伯用一個好貶嘅詞，話我係小不用，大佬係大不用，點解呢，睇唔起你哋囉，因為你哋出身背景唔夠好，學問知識唔得高。咁我就覺得壓力越大，反抗越強，吃得苦中苦，方為人上人。」
因為讀得書少被看輕，狄龍惟有自我增值：「我讀到夜校初中就冇讀，我其實係做半童工，一直送火水、送牛奶，人生滋味就好似一條抹枱布，五味雜陳，酸甜苦辣都喺裏面。好多嘢都係自學，好似英文，後期轉咗去半島酒店做洋服學徒，同洋人交易，睇多啲英文書，聽多啲，所以日常英語會話，我都OK嘅。」當年在洋服店學師做到售貨員，薪金有2,000多元，狄龍說：「等於而家2、3萬蚊一個月，咁我細個鍾意睇戲，睇關德興、石堅、于素秋，好迷嘅，夜晚我去健身，練得幾硬朗，睇到邵氏招考新演員，咁我就膽大大，我諗而家年紀如果唔試，邊有機會再試，咁我托朋友寫封信，因為我啲字寫得唔係咁好，托朋友寫得端莊啲，投寄咗照片。」
當日投考試鏡情況，狄龍仍歷歷在目：「記得仲要打套拳，講幾句國語，我啲國語梗係笑死人啦，咁張徹導演取錄咗我，當時何冠昌先生同我講：『睇你嘅外表，我哋公司會培養你，呢個係你嘅終身職業！』嘩，呢句說話呢，突然間喺個腦轟一下開竅，因為有兩個職業係我最鍾意嘅，一個係投考警察，但係好不幸『肥佬』，咁就走去考演員，結果成功取錄咗，編排入訓練班。但當年收入好微薄，得500蚊一個月，簽8年，記得我首先同老母講：『媽，我而家搵到份嘢做，但我呢幾年都唔會畀到錢你。』阿媽就話你去做啦，但我同老闆請辭時，佢願意加我人工，我同老闆講，我去行船，呃佢！」
結果狄龍加入邵氏後，展開了至今50年的演藝生涯，憑《刺馬》、《天涯明月刀》、《少林寺》、《英雄本色》等電影紅遍東南亞，耿直的狄龍坦言曾被名利沖昏頭腦：「好慶幸一帆風順，亦都有迷失嘅時間，勝利有時沖昏頭腦，『當時年少春衫薄，騎馬倚斜橋，滿樓紅袖招（《菩薩蠻》 韋莊）』，嗰種驕傲感同成就感沖昏頭腦，結果闖禍，喺夜店同啲洋人警官發生毆鬥。」回首前塵，狄龍搖頭說：「一件醜事，雖然係冇打敗，但都犯咗官非，亦都多謝張徹導演同邵逸夫先生出手營救我，當時情形係洋人警官飲醉酒，同我嘅朋友毆鬥，我嘅朋友唔夠打，結果負傷，咁我識聽佢講嗰啲英文……都係唔好講啦，醜事，唔應該咁嘅，後來法官都原諒咗我，咁畀我一條生路，如果唔係，呢個成為我終身嘅污點！所以，我而家勸個仔都係，你血氣方剛時，對飲酒戒之在鬥，千祈唔好撩事生非。」
而在邵氏18年，狄龍跟楚原導演合作很多，對於楚原叔在金像獎的一番感言，狄龍說：「楚原導演畀我最受益金句：『你要變成泥土！』我踩住前人嘅泥土行，我變成泥土，俾後人踩住我繼續前進。『落紅不是無情物，化作春泥更護花。（出自於龔自珍的《己亥雜詩·其五》）』」而狄龍的人生金句，就是「做到老學到老、包容、尊重自己、原諒別人，清濁並包、善惡兼容」，他說：「冇人真係想犯惡做衰人，只不過有時環境或迫於無奈有苦衷，你咁睇就唔會有憎恨心，平常心去包容大是非。」
做到老學到老的狄龍，將首次參與音樂劇《搭錯車》演出，扮演「啞叔」一角，83年電影《搭錯車》由孫越扮演「啞叔」，孫越更憑此角封金馬影帝，珠玉在前，狄龍說：「電影睇好多次，有鼓勵作用，因為孫越始終係一個好成熟、好有大器同內涵嘅藝人，佢仲有智慧，同埋佢係虔誠嘅基督徒，信念同念力好夠，我係好欣賞佢。今次高志森導演做我指導，佢提供好多寶貴意見畀我，所以呢方面我都唔使操心，冇乜叫做難，工作一部份，手語有啲複雜性，所以我有時做得唔完美，但面上感情補足番。」
撰文：余燕儀
攝影：仇志德
攝錄：廖達燊
髮型：Mike Ting @ HAiR
化妝：Josephine @ J LAB
場地：8度海逸酒店
【編輯推介】
【暴雨過後】貼新相重回正軌 鄭秀文：不回望，向前看
https://bit.ly/2ZJEUu3
【電梯擁吻】何超蓮撻着30歲內地男星竇驍 二人微博公告拍拖：狗糧狗糧！
https://bit.ly/2L8zAx2
【中港車逆線駕駛】叫涉事受僱司機自首 吳啟明在車上目擊：嗰幕好驚險
https://bit.ly/2VAtJ7q
【韓娛圈醜聞】明日再接受調查 專家分析朴有天疑講大話
https://bit.ly/2DB6VdK
【韓娛圈醜聞】生前錄音透露有生命危險 警方稱張子妍案冇調查價值
https://bit.ly/2Wf96ec
《MCU寶石時軸全記錄》
1套6冊解構Marvel電影宇宙
入場睇Endgame前必讀天書！
https://hk.adai.ly/IFk7iee55V
-----------------------------
【記住63836568】全民爆相爆片！下一個爆料王就係你
https://bit.ly/2Guolu9
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|