符致逸Adrian，呢個名對大家嚟講可能仲有啲陌生，但講到佢係陳奕迅《我們都寂寞》、《路…一直都在》嘅作曲人，即刻對佢有啲印象。
本身做Marketing嘅Adrian，早於台灣出道，創作過唔少金曲，亦喺當地出過一隻唱片《Good Morning, Hard City》，直到16年，佢選擇返嚟香港，簽約環球唱片，全職做歌手。
做歌手同幕後嘅分別好大，做幕後寫歌時會當係一份工作，但當你做幕前，仲要演繹自己原創嘅作品，我覺得除咗要寫到好音樂之餘，亦都一定要有自己嘅想法、定位、想要表達嘅信息，要同其他人溝通，我覺得呢方面非常重要。
Adrian本來有份高薪厚職嘅Marketing工作，但係為咗全情投入音樂夢，唔單只辭咗份工，就連freelance都唔接。
我覺得去到一個地步，唔想再做其他嘢，以前marketing嘅同事間中都有搵我兼職做吓project，但我試過一兩次之後覺得完全無興趣，就算從事音樂業界其他崗位，我覺得自己都會留喺呢個圈子，唔會再返轉頭。
同陳奕迅合作咗十幾年，Adrian幾乎係佢御用作曲人，入行做歌手，幾個月前一個陳百強嘅紀念音樂會，仲可以同台合唱，呢個交流應該好難忘。
其實嗰次係第二次，我記得第一次都唔會好多合唱機會，第一次係大約○七、○八年佢喺台北小巨蛋舉行巡迴演唱，我喺演唱會當中彈奏《我們都寂寞》，另外再玩咗一首歌，但每一次同佢玩都學咗好多嘢。喺紀念陳百強活動中，佢教咗我一件事，佢見到我身體經常左搖右擺，然後佢好友善咁走嚟同我講，叫我喺比較激昂，或者比較高音嘅時候，嘗試淡定咁企響度，呢個技巧完全係行得通，所以每次同佢合作，不論唱歌、幫佢寫歌，都會學到好多嘢。
等咗咁耐，終於推出咗一張屬於自己嘅唱片《The Night Begins》，感覺又係點呢？
真係好感恩，因為真係唔容易，同埋等咗五年，呢個係自己同公司嘅一個決定，因為我一向覺得推出一隻唱片，要話俾人聽，喺人生某個階段劃上一個句號，或者插咗一支旗，所以對我嚟講，自己要等咗四、五年，先搵到一個推動力，同埋搵到主題將全部音樂包裝好，再用一個比較仔細嘅方法去同大家溝通。
咁唔知《The Night Begins》係講啲咩呢？
今次呢隻碟係我第一隻廣東碟，係我第二隻專輯。今次隻碟主題係四年前辭
工，加入環球唱片公司，呢四年間情緒上嘅一個旅程，歌曲亦會講到工作上，或者社交、朋友、愛情方面經歷過情緒上嘅大起大跌，所以呢隻碟係講述自己過去四年嘅生活。
出碟咁開心，Adrian班師弟師妹要同佢舉杯慶祝，有邊個？包括樂隊One Promise，以及新女Jace！
採訪：肥A
攝錄：李玄
來源 source: http://nextplus.nextmedia.com
|
鍾意就快D Share啦！
|
|
|
