80年代經典處境劇《香港81》系列，曾一度以1,330集成為香港集數最多的劇集，陪伴香港人成長。由陳泉飾演的「順叔」真身原來是一名「全通車」（昔日外景客貨車）的老闆，他由接載藝人出入，自己卻成為藝人，當年更頂硬上為家計會拍「兩個就夠晒數」廣告，誤打誤撞下成為經典人物。
相關新聞：義載佳視員工上街
提起處境劇《香港81》系列，不少觀眾肯定記得「懋叔」黃新和「順嫂」梁葆貞，不過，香港人最熟悉的「順叔」，應該是在1975年家計會「兩個就夠晒數」的宣傳短片，片中滿頭大汗撐住一家大細的陳泉，吃力地划着超載小艇，無奈舉起兩隻手指回望，幕幕都是香港人的集體回憶。
| | |
員工逾200人
移民多倫多30多年的泉叔早前返港探親，並接受《蘋果》訪問，提起當年這個經典廣告，泉叔笑說只是頂硬上：「我幫手搵臨記，個導演拍嚟拍去都唔滿意，我望吓個鐘，日落啦，冇得拍啦，我同班臨記講：『起身起身，我嚟。』嗰度喺沙田畫舫附近，嗰啲水臭到不得了，如果沉咗船就臭死㗎喇，我好驚，好苦，我唔識扒艇，隻艇咪氹氹轉唔會走出電視鏡（鏡頭）囉，點知個導演反而話咁就啱喇。」
其實在80年代，泉叔經常在無綫劇集客串，但他真正身份其實是全通車的老闆，租車予無綫、麗的（亞視前身）、佳視、香港電台及電影公司外景攝製隊，全盛時期，泉叔包下整個五台山（廣播道）租車服務，擁有170部全通車，員工逾200人，廣播道曾被行內人喻為「陳泉道」，行內人甚至封泉叔為「廣播道交通巨子」。85歲的泉叔受訪當日回到他成名的廣播道，謙虛地說：「我啲車如果泊晒出嚟，成條廣播道都唔夠泊咁滯，所以啲人就成日笑我之嘛，好唔好意思。」
泉叔的故事由一部客貨車開始，「我本身有車，有啲街坊夜晚要生細路或者有啲乜嘢事，就走嚟撳鐘搵我，有個女仔咁啱去電視台表演，佢媽媽唔放心，要我送佢個女去電視台，又送又接，見到啲人慢慢熟咗。電視台後尾發展《歡樂家庭》，四周圍搵嘢拍，我將佢哋介紹去電視台訪問，大家互惠互利嘅時候，我慢慢就同電視台熟咗。」
無綫電視劇70年代開始拍外景，對全通車需求量大大增加。泉叔說：「初初無綫冇外景，我由一部車做起，同佢哋共同發展，大家越行越大。佢哋唔係冇車，係唔夠車。」泉叔開全通車公司租車及提供司機給無綫，他身為老闆也愛親力親為車出車入，由於泉叔閒時愛揸車捐窿捐罅，無綫劇集找外景場地，總會找泉叔幫忙搵景借場，最重要是泉叔從不斤斤計較，無綫上上下下自然當泉叔「神咁拜」。
相關新聞：接送肥姐成莫逆
珍姐力邀拍劇
打理全通車公司已經夠忙，何以仍抽時間客串幕前？泉叔笑說：「電視台有時欠個人就做唔到，我咪做埋囉。」講到接演《香港82》順叔角色，泉叔解釋：「我同曾勵珍講，個順叔成日唔見嘅？佢話：『我正想搵你呀。』因為個角色係行船，我咪兼住嚟做囉，我又唔志在靠藝員份人工生活。」
提到昔日事情滔滔不絕的泉叔，講到家人時突然變得傷感。原來，泉叔43歲細仔數年前在深圳遇上車禍身亡，泉叔忍不住落淚說：「唔知點講，唔樂觀都唔得啦，事實冇人可以改變。」泉叔移民多倫多30多年以來，每年總會返港探朋友。只是，一個個老友總比他早一步離開，「以前返嚟探朋友，𠵱家就係送朋友，所以見得幾多得幾多」
|
鍾意就快D Share啦！
|
|
|
