大台打算挾住《延禧攻略》嘅氣勢，用《皓鑭傳》再搶收視，最後滑鐵盧！成績唔理想，大台梗係唔出聲費事自揭瘡疤啦，話晒4月中就播完由佢默默告一段落啦。點知好衰唔衰，大台旗下嘅《See See TVB》竟然出咗條片力數《皓鑭傳》四宗罪，認真倒米呀！
《See See TVB》係大台旗下一個專頁，主要為大台播出節目製作、發佈惡搞片段，例如配合劇集、節目局部片段，重新配過對白內容，變成一段新嘅搞笑片段。
不過，近日就發佈咗一段「皓鑭傳-牽強場面大點閱！」力數劇中四大唔合理情節，包括皓鑭生咗個嬴政BB，啱啱出世但起碼廿磅重唔合理；呂不韋背、腹各被插一劍，仲被踢埋落山，唔死不特止，再現身時連衫都換埋疑似唔連戲；套劇係戰國時代，竟然出現紙張？都算喇，仲有埋隱形墨水添，係好嘢喎；公主雅額頭有大大條疤，唔使磨皮、做激光，畫朵花就可以去疤。
《See See TVB》唔怕方丈份人好小氣，明踩套劇，唔少網民發現條片唔係惡搞，反而認真指出劇集問題，都口講「大膽」，實質欣賞呢個專頁夠「吉士」！不過大台自家製劇集本身都大把呢類牽強位，要數，怕且……
來源 source: http://nextplus.nextmedia.com
|
鍾意就快D Share啦！
|
|
|
