(Getty Images)
英超煞科日前5名都交到貨，大家幾乎忘記咗曼聯，原來佢哋煞科日輸波呀，仲係主場對已降班嘅卡迪夫城，淨吞對方雙蛋，恥辱性地以第6名結束今季，看台上前領隊費格遜玄壇咁面，激到彈起，賽後球迷怒罵保羅普巴係「該死的狗屎」，最後一場都要鬧鑊甘。
曼聯上仗作客打和已降班嘅哈特斯菲爾德，搞到爭取前4正式玩完，已經離晒大譜，但估唔到返主場踢煞科戰，球員都係無厘神氣，連交行貨都費事，結果被客隊前鋒文迪斯拿恩治梅開二度，淨勝曼聯兩球光榮降班。而曼聯對兩支降班隊1和1負，再係咁落去真係等降班都似。
通常球隊喺主場煞科，球迷都會高高興興同球員道別，答謝球員辛勞都會畀掌聲，但曼聯就唔係咁，部份球迷不忍卒睹提早離場，留低嘅球迷就向主隊球員瘋狂柴台，保羅普巴成為攻擊目標，有球迷大叫蘇斯克查將普巴趕走，亦有球迷直接鬧普巴係「該死的狗屎」。
高薪低能嘅曼聯首席打工皇帝阿歷斯山齊士，賽後在個人社交網站向球迷道歉，佢承諾會幫助球隊重建輝煌，佢咁講即係表態唔會離隊，繼續做蛀米大蟲，而兩名主力安達靴里拉同路爾斯華倫西亞就向球迷道別，令人有該走嘅留低，唔該走嘅離隊之歎。
來源 source: http://hk.on.cc
|
鍾意就快D Share啦！
|
|
|
