周日（16日）是父親節，生煎包王子蕭潤邦同太太江若琳提早同爸爸蕭冠豪慶祝。一行三人穿上曼聯球衣表達對球隊的死忠，到旺角麥花臣球場睇波，餘興是到波鞋街，齊齊搜購波衫。之後他們回到生煎包店接受訪問，阿邦講到14、15歲起，兩父子就連繫了「足球情」，他說：「我因為身高，廳嘅梳化至係我合適嘅居住環境，所以由細到大都要瞓廳。每次老竇要睇波都要出廳，咁我就一齊睇。你知一場波有中場休息，咁我哋會傾偈，乜嘢都傾，有好多嘢講，可以增進感情。」
出身於二人組合Bliss的蕭潤邦，早年以歌手身份轉營賣生煎包，談到跟爸爸的父子情，伸延到最近在旺角開業的生煎包店，因為店名用回昔日父親經營印花廠的名字。阿邦笑言從小就到老竇印花廠做童工：「每次拎起電話就會話『堅信植毛印花廠』，講到入晒腦，個電話號碼都仲記得。一放學就去打工，而家冇咗呢間印花廠，隔咗10幾年，到自己開店，就想用番呢個名。間印花廠養大我同細佬，所以而家呢間生煎包用番呢個名，養番蕭家。」身為家嫂的江若琳（Elanne）就直言老爺、奶奶的心境比自己還年輕，她笑說：「記得有年嘅萬聖節，想問吓老爺喺邊，想搵佢哋一齊食飯，點知佢哋話想去蘭桂坊玩。」
雖然性質不同，新店依然有傳承的意思。原來蕭爸爸一直有參與生煎包店的營運，更可以說是「出品部主管」，故事源於10多年前第一間店開幕時的遭遇，阿邦說：「到而家都會記住，開店頭半年已經出現一件事。嗰陣個廚房師傅，做咗冇耐就攞咗我哋個menu，去隔籬街開咗間一模一樣嘅舖頭。通常我有乜嘢事，都會打電話畀阿爸阿媽先嘅，好似以前喺屋企肚餓，就會喺廳大叫『肚餓呀，煮個麵我食吖』咁，或者真係一啲行動上要解決，都會打畀老竇，因為知道佢唔會跣我，我又唔會跣佢。啲人話父母喺危急時候好大力，我就感受到，嗰陣老竇本身有份工，但係佢用兩個禮拜學晒我成個menu。」
蕭爸爸續說：「嗰個師傅走咗之後，企晒喺度。阿邦畀電話我問點樣，梗係諗都唔使諗，辭咗份工，仲要賠咗一個月畀公司即時走，一直幫到而家。」他表示趁師傅還在的時候去學，雖然對方「教啲唔教啲」，幸好本身一向對食有興趣，所以比較易上手，他說：「我亦都知有保留，慢慢去研究分析，最重要試過味道，直到而家開完一間又一間。」
阿邦聽爸爸提起這段往事，他說：「開咗第一間店，人哋以為好成功，但佢哋唔知道頭一兩年，我蝕咗好多錢。老竇辭工幫我呢件事，真係最感動，兩父子都唔係靠父幹，老竇返嚟係幫咗成個家庭，嗰時交電費錢都冇，基本每個家庭成員都周圍借過錢。我覺得唔抵，屋企人又冇不良嗜好，嗰個屋企支撐唔到，好似堅信印花廠，係喺香港最興旺嘅時候好無奈結業，其他行業當道，嗰段真空期好難受。」這時候阿邦已經語帶哽咽且眼泛淚光，他補充說：「嗰時係冇得輸、唔輸得，輸就輸晒心機、時間同錢。每逢困難嘅時候，超人就會出現，流汗啫，唔使喊，不嬲都感受到父母愛。」阿邦透露今個父親節會在工作度過，留待收工才在店內慶祝。
採訪：何永寧
攝影：陳俊強
攝錄：廖達燊
場地提供：堅信號上海生煎皇
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9
|
鍾意就快D Share啦！
|
|
|
