17歲參選港姐後入行嘅陳思齊（前名陳凱怡），做過旅遊節目主持，之後轉去主持小朋友節目，當時佢識咗霍健邦，好快佢哋就拍拖，不過，年幾後就分手，陳思齊亦因為咁而激瘦咗20磅。
蓋世寶問：「記得有段時間，你由好活潑，仲有少少肉地，變成一個好瘦嘅女孩子，嗰段時間係咪情緒上有啲問題？」陳思齊好直接咁答：「因為俾仔撇，情傷。」應該係嗰一個（霍健邦）？「你嘅意思係你知道嗰一個？我諗應該係嗰個啦。」嗰件事對你係咪都好深刻？「印象有啲模糊，因為已經係好多年前嘅事，我覺得嗰時令我最傷心嘅係，因為本身好天真，我唔係好識得處理另一半對住我講大話呢個問題，因為我覺得自己好苦惱，到底其實你係想我知道，定係想我唔知呢？點解你個大話唔諗清楚先同我講，我就會唔識得俾反應。我好天真咁樣問，你上次唔係咁樣講喎，例如你嗰日唔係話今日有事情要做咩？然後佢就會發脾氣。當佢發脾氣嘅時候，我又會覺得好似唔啱喎，總之當我提出任何問題，佢都講到好似我唔啱嘅時候，我年紀又好細，會覺得好似真係自己唔啱，好似唔應該問佢去邊，好似佢嘅電話有女仔相係好正常嘅事，覺得係自己唔啱咁樣，總之其他人叫我小心啲嘅時候，我只係隨便講幾句，咁樣都係我唔啱；然後有女仔打電話嚟，我唔小心聽咗又係我唔啱，係佢叫我接聽，但我聽到係女仔，對方仲要話係女朋友搵佢，叫佢打番俾女朋友，咁我係咩嘢呢？嗰一刻我質疑自己究竟係咩呢？我仲答對方話好呀，轉頭叫佢打電話俾你，然後同男朋友講，頭先你女朋友打電話俾你，但都係我唔啱，喺呢啲情況之下。」
自認不能做後宮佳麗
聽到陳思齊咁講，蓋世寶忍唔住笑，仲講：「唔好意思，我唔想笑，但真係好好笑。」陳思齊見到蓋世寶笑成咁，就話：「我真係好蠢，嗰時真係好傻，因為我唔識嘛，嗰時未遇過呢啲情況，同埋我係一個好直嘅人，鍾意就鍾意，唔鍾意就唔鍾意，唔好咁樣對我，唔鍾意嘅話就不如分手啦，佢又話鍾意喎。後來我終於搞清楚，原來佢只係唔可以淨係鍾意我一個，我終於得到一個咁嘅結論，然後我問自己可唔可以接受呢件事呢？我覺得自己唔可以，之後就真係完咗嗰件事。但喺呢個過程中，令我覺得佢對愛情好混亂。」呢個係咪第一次拍拖？「因為之前有啲puppy love，呢個算係好正式嘅，佢話會結婚嘅，當然我又係好傻豬咁信佢，我心諗自己都係得十幾二十歲，你同我講結婚，感覺好似有啲遙遠，不過是但啦，當時又覺得幾開心。但相處期間發現有好多謊言，其實我好迷糊，同埋永遠都係佢講嘅嘢就啱，我永遠都唔啱嘅時候，無論我問乜嘢都係我錯嘅時候，我又唔識得駁嘴，見到佢咁惡時又會道歉叫佢唔好嬲，當時的確好傻豬。但當得到一個咁嘅結論之後，我就開始覺得唔OK，唔係可以喺後宮生活嗰種人，所以就離開咗。不過喺嗰段時間有調整自己，因為真係會唔開心，自然胃口都唔會咁好，同埋當時工作量都幾多，所以都好攰，然後媽媽身體又唔係咁好，所以喺好多事情發生嘅情況之下，嗰段時間係瘦咗好多，之後就一直無再肥過。你話關唔關情傷問題，我諗係其中一個原因囉。」
情傷後情緒有問題
嗰次情傷有冇導致情緒出現問題？「當然有啦，我當時喺公司都真係笑唔出，無表情，大家都會關心我發生咩嘢事，但其實我都無做乜嘢，只不過淨係坐喺度，其實我喺度諗緊嘢，要整理好多思緒，喺唔使埋位嘅時候，其實就喺度整理緊，究竟係咪我做錯呢？諗吓啲好傻豬嘅問題。有啲睇唔過眼嘅人就會教我、話我，然後我又要消化朋友對我嘅關心，又要消化、過濾到底邊啲啱用，邊啲唔啱用。因為有人會教我鬧番佢，但以我性格，當時嘅我其實唔係好識得鬧人，我唔識得點樣去鬧番佢，同埋唔識得駁嘴，覺得好似真正自己唔啱，騷擾咗對方。所以好多時間都唔出聲，要整理好亂嘅思緒。當時同吳卓羲、陳鍵鋒一齊開工，佢哋都會叫我唔好咁傻，成日都聽到有人叫我唔好咁傻，俾佢哋話過好多次之後，我發現原來男人係咁樣㗎？個樣會變得更迷惘，覺得拍拖原來係咁樣㗎。」如果有圈內人追求，會唔會接受？「嗰一次之後就再無啦，我唔會再揀呢一行嘅人。」咁又真係有啲危機嘅。「其實都唔關呢一行嘅問題，我唔可以話淨係呢一行嘅男人唔乖，但係佢特別多理由可以唔乖。同埋所有嘢都可以合理化，例如返工聽唔到電話，我要返內地工作，所有嘢都係好合理嘛，同埋身邊出現嘅女性都係fans嘛，點樣講都可以，當所有嘢都合理嘅時候，變相會覺得最好唔係呢一行。」
攝錄：王志明、吳斯金
策劃：肥A
蓋世寶化妝及髮型：Albee（嫁妝）
下載連結： http://bit.ly/Next29App
如對會員訂閱制遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
