53歲的羅霖自2013年離婚後，復出頴銀養家。羅霖痛錫三名兒子，不想他們生活因父母離婚受到影響，堅持繼續讓兒子得到最好的教育和生活，孭起頭家，每月開支超過十萬，羅霖努力工作撲水養家，工作壓力爆煲，近日出現甩頭髮情況，由於身邊未有人可供挨吓訴苦，羅霖會匿埋喊，自爆喊濕過幾個枕頭。
撰文：比華利
攝影：林德雄
相關新聞：教擺甫趕多餘肉
娛圈中不少單親媽咪，堅強地母兼父職撐起頭家。53歲美魔女羅霖也是表表者，她96年嫁給富商劉坤銘後淡出娛圈做少奶奶，婚後生了三名兒子，可是豪門生活並非永久保障，她於2012年與劉坤銘分居，翌年正式離婚。失婚羅霖，由闊太變單親媽咪，她除了要照顧三名兒子，還有年邁父母，為了讓家人生活得舒適，三子成長中得到最好，月花逾十萬，她不惜搏命頴銀。羅霖日前在九龍塘接受《蘋果》專訪時說：「我咁搏命當然為三個囝囝，不過我都覺得人嘅一生，生命有限，要盡量學多啲，做多啲，到將來年紀大，問番自己，我呢一生係咪無憾，我冇浪費自己人生。」
二仔實際
三名兒子仍就學，兩子已入大學，長子劉子榕（Nathan）在港讀大學，二子劉子熙（Jordan）美國升學，幼子劉子晉（Jonathan）則讀國際學校，羅霖每月開支龐大：「三個仔啲學費，同屋企開支，計埋一個月起碼都六位數字。大仔轉過幾個主科，佢讀過藝術、律師，𠵱家轉咗讀電腦設計，我成日話佢讀藝術搵唔到錢，二仔就讀心理學，佢實際啲，我安慰啲，我同二仔講，叫佢讀完先醫吓自己，了解吓自己情況先。都巿人好緊張，情緒病都多咗，好需要人傾偈，所以醫埋屋企人先出去醫人，唔係話代表屋企人有情緒病，而係想令大家做人開心啲，乜都睇淡啲。」
相關新聞：投資兩生意回本
| | |
自閉調息
羅霖不停賺錢，近日出新書一腳踢構思和籌備，其間遇上重重困難，全部獨力解決，「我當時好大壓力，頭部側邊仲出現甩頭髮，一梳啲頭髮就係咁跌落嚟，以前生完BB都冇咁犀利，我知係壓力造成，所以休息多啲，食番啲營養補品，𠵱家情況好轉番。」
回望過去六年，羅霖走出離婚陰霾，振作復出，人生上走了崎嶇路，回想墮入低谷，她坦言有以淚洗臉：「我梗係有爆喊，全部閂埋門先喊，我從來唔會喺小朋友面前喊，我唔會將自己啲唔開心同壓力畀小朋友見到，佢哋已經係單親家庭，唔想將我嘅唔開心加落佢哋度，佢哋會有陰影。」遇上壓力爆煲，羅霖就會自閉：「我會閂埋門祈禱，都喊濕好多個枕頭。」即使再傷再痛，羅霖都咬實牙關，強迫自己理智起來。
三子正放暑假，問到羅霖可會一家四口出埠旅行叉電，她笑言：「旅行其實係獎小朋友，唔係獎我自己。我做過空姐六年，好多地方都去過，好多嘢都食過，睇風景同買嘢，我後生做過晒，𠵱家有咗小朋友，去旅遊地點，食乜玩乜，全部問佢哋，我只係陪食、陪玩同畀錢嗰個。」
分飾三角
羅霖絕對是200分好媽咪，她卻說：「盡量做，我有時都不足，我哋關係係朋友，𠵱家做媽咪要包括好多角色，又係朋友，又係媽咪同玩伴，將來囝囝佢哋如果拍拖，我唔會擔心，仲歡迎佢哋帶女朋友返嚟。」羅霖謂還會教導囝囝待女朋友必須有風度：「就算分手都唔好講對方壞話，和平分手要講得清清楚楚，唔好一腳踏兩船，要有紳士風度。」
現在單身的羅霖表示暫時無意再覓第二春，難道不想脆弱時有個膊頭依靠？羅霖卻說：「好想有個膊頭挨吓，但挨住囝囝先啦。我對感情好專一，一拍拖會好投入，拍拖一定有開心同唔開心，如果唔開心，再加上工作壓力會好易爆煲，所以我暫時專注工作先。」
場地提供：Hair Salon
化妝：Peggy Tsui
髮型：Jay Cheung of Hair Salon
|
鍾意就快D Share啦！
|
|
|
