馬上成為壹會員
會員專區 只限會員閱讀
機動遊戲呢家嘢，真係齋睇人玩已經好驚。《延禧》女主角吳謹言、周星馳電影《美人魚》女主角林允，以及范冰冰細佬范丞丞等人，參與綜藝節目《青春環游記》，唔單只要坐跳樓機，仲要揸住兩杯水上，睇下邊個玩完後剩低嘅水多。其實齋聽佢哋尖叫聲，就知杯水一定所剩無幾。
有經驗嘅人都知，玩呢類機動遊戲，突如其來嘅離心力，好難唔令人自動緊握扶手，所以佢哋手上嗰杯水喺跌落嚟一刻，心一驚手一握就無咗大半杯。
不過，女士們雖然嗌到鬼殺咁嘈，但杯水仲有啲剩。反而係班仔，跳樓機都未上到頂，佢哋已經握到水杯扁晒無咗大半，落嚟之後再握緊啲，杯水就自然揸乾揸淨，難怪有觀眾話佢哋誇張造作。
當然，有粉絲為偶像抱不平，例如話范丞丞本身畏高都玩好值得欣賞，又讚佢事先將水含入口，之後忍唔住噴出嚟好搞笑。但亦有人反駁，話佢如果真係驚，噴水一刻應該係一次過噴晒出嚟，而唔係畫面所見咁，逐啲逐啲吐出，睇落相當刻意。
都係嗰句啦，節目效果，認真便輸了。
立即下載APP，精彩內容壹手掌握
如對會員訂閱制有遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|