逾百名白衣人於周日（21日）晚上在元朗站手持藤條和鐵通，無差別襲擊市民及西鐵乘客，造成至少45人受傷，新界西建制派立法會議員何君堯當日被影到在「血洗元朗站」前，曾與白衣人握手問好，更稱白衣人是「英雄」，曾一度傳何君堯有份策劃，何君堯已否認。
何君堯和新界西立法會議員朱凱廸今早出席港台節目《視點31》討論「血洗元朗站」事件，何君堯在節目上多次要求朱凱廸「唔好再講光復」，朱凱廸強調市民有權示威，何君堯竟然拍枱批評朱凱廸言論，他離場時指摘朱凱廸「唔配做議員」，有港台員工反撃稱何君堯「你都唔配」，何君堯與朱凱廸在節目中短兵相接，何君堯指對白衣人襲擊市民感到心寒，但他並沒後悔與身穿白衣的朋友握手，完成訪問後，有一堆市民在港台門外等候。
在直播影片當中，見到主持完節目《早霸王》的森美都在港台門外，與市民閒聊，影片中森美說：「佢未走，好難趕佢走。」《蘋果》向森美求證，看他是否等何君堯出來，森美解釋：「我冇見到佢，放工經過門口，見到好多人，佢哋話何君堯同朱凱迪喺嗰邊做訪問，跟住我就返屋企。」問到對何君堯有何評價？森美短訊回覆：「Sorry.No comment.」
十多名市民於12時許，看到何君堯步出，現場人士叫「握手」，何君堯走到閘口，示意保安開閘，開門跟在場人士握手，何君堯：「既然你要同我握手，我就行出嚟同你哋握手，大家冷靜啲，有任何訴求我哋可以表達，就算你用粗口，DLLM罵我，我習慣聽慣，喺8月4號我哋有一個集會，大家一齊傾偈，大家最緊要和衷共濟坐埋一齊，我哋唔好訴諸暴力，你鍾意講任何嘢都冇問題。」在場人士問：「你啲黑社會兄弟呢？」何君堯大笑兼指向發問者：「你就係我最親近嘅兄弟，如果係，你係唔係黑社會呀？」被問為何四圍跟人握手，何君堯猶如「錄音機」回帶再提大家8月4號一齊傾下偈，他說：「有任何交流，我係絕對歡迎，所以……剛才我見到有人拎起對鞋想掟我，對唔住！下次如果你想攞對鞋都攞對8號半畀我，而且我啲鞋都行到蝕晒底，如果係掟就掟一對畀我。」
現場人士大叫「你唔好講笑」、「仆街」、「笑騎騎放毒蛇」，問到他是否有美國國籍、是否申請當中，何君堯直言：「我冇！我冇！（為何網上有一個聯署稱阻止你申請）網上傳言好多都係假，剛才我有問朱凱迪『係咪你吹大雞去元朗』，佢話『唔係，你唔好信呢啲嘢』，至於美國國籍係冇，完全冇申請，你哋千祈唔好信流言蜚語，我同大家講我冇外國居留權，亦都冇申請，OK！」
會不會譴責當日打市民的白衫人，何君堯強調譴責任何犯罪的人：「（白衫打人嘅人會唔會譴責？）我會譴責、我會譴責、我會譴責，我亦譴責喺西環衝突嘅人，譴責任何暴徒，一視同仁，我同大家講任何犯法嘅人士，不論你着咩衫，你犯法就係犯法，包括喺元朗、喺西環、喺中環、喺海富附近全部都譴責，唔單只譴責，仲要將佢哋繩之於法，通過法律制裁，要面對後果。」
之後在場人士嗌「唔好嘈啦，賊喊捉賊」，何君堯反駁：「咁你叫我講畀你聽，你又叫我唔好嘈，你哋係唔係思覺失調，你要同我傾偈，我又同你傾偈，你掟鞋畀我，我叫你掟一對鞋畀我好唔好，唔好掟一隻，仲要係女裝，多謝！Thank you！」講完拍拍手，有人問他會否救契仔劉馬車，何君堯反撃：「嗰個唔係我契仔，可能係你契細佬或者契哥。」何君堯行前幾步想上車離開，四圍張望，原來他的七人車仍未駛離港台停車場，當時在場人士意有所指：「喂！你行錯路呀！」
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
|
鍾意就快D Share啦！
|
|
|
