上個月書展曲終人散，今年的寫真焦點落在美魔女如羅霖、溫碧霞身上，當年一班𡃁模在書展波濤洶湧的場面已成歷史，不過，還有一個被封宅男女神的繼續有書出，仲要打孖出兩本的孫慧雪。
由《美女廚房》的「助手妹」、世界盃的「世界妹」再到《一擲千金》的「千金妹」，阿雪孫慧雪可說是妹仔出身的代言人。一日妹仔一世做妹仔，難得阿雪自得其樂，「我真係太開心，我做妹仔嗰陣都係猛咁睇人（喺旁邊）做戲囉！」
孫慧雪自認臉皮薄，不敢日日走上監製房敲門𢱑機會的她，入行13年以來，去年的《三個女人一個「因」》已是她最重戲份的一套劇，不過伯樂監製潘嘉德也榮休了。
所以，妹仔繼續有得做就做，阿雪真正當女一的機會，留待回到家中做屋企的主人婆。當刻最忙的，是訪問後要為兒子Riley準備兩歲生日派對！
撰文：文嘉龍
攝影：陳俊強
8cm子宮腺肌瘤
剛過去的書展，阿雪出了兩本書，一本是她口中「嘔心瀝血」寫出來的散文集；另一本是集合幾位女模而出的寫真合輯，封面由阿雪一個人孭飛。埋單計數，阿雪心中有數，「大家都係現實啲，可能嗰本小布啲啦，本身都係印咗千幾本，喺書展已經冇晒，我諗要翻印，另外一本都仲有啲，反應都OK！」
相隔三年再出書，適逢書展舉行期間，阿雪在網上自貼「千萬飯局」cap圖，總算製造了話題，「我覺得好funny所以分享出嚟，佢話我畀一千萬你，我哋食餐飯㗎咋，我冇覆佢，我覺得好搞笑囉，一千萬一餐飯喎，我同我老公講，咁你咪爭我好多錢？我覺得一定係假，同埋好無稽，所以我覺得唔使回應佢！」
不過入行多年，總有遇過中間人問價吧，「入行初期可能細路女啲，啲人會覺得易𠱁啲，試過有啲中間人打嚟，叫我陪食一餐飯，畀幾多錢我，成日都有呢啲邀請。又試過有一次，我夜晚瞓緊覺，差唔多凌晨有個男人醉咗咁打嚟，叫我出去食飯，我問你係邊個？佢話我哋呢張枱有人識你，畀咗你個電話我，你出嚟食飯啦，我哋呢度有好多artist！」
阿雪知道「出嚟食餐飯」當然不會食飯咁簡單，「嗰時好細個，佢哋話你出嚟食餐飯一千蚊、二千蚊就咁食餐飯，我梗係唔理啦，我覺得唔會咁簡單囉，如果佢唔俾你走咁點？唔係食飯咁簡單，唔好冒險囉！」
在散文集中，阿雪還自爆得了子宮腺肌瘤的經歷，「我當時拍緊三套劇，可能真係太辛苦，又加埋情緒影響，拍完之後我條尾龍骨好痛，我就去睇醫生，醫生照到有8cm嘅子宮腺肌瘤，嗰個瘤喺子宮內壁入面，如果要做手術，要成個子宮割咗去。」
阿雪在醫院聽到這個消息，眼淚一直流未停過，那時候還未結婚的她，已有計劃婚後立即生B，忽然得了子宮腺肌瘤，簡直晴天霹靂。「因為我個瘤個情況好嚴重，我一個月大1cm，當時因為大得太快，醫生以為係cancer，要我去做一個全身麻醉抽組織。當時算係我人生比較唔開心嘅時候，因為我好想有BB，我屋企係單親家庭好多人都知，變咗細細個我就有個心願，好想大個之後有自己家庭，成家立室有自己小朋友，組織一個好幸福嘅家庭，當時我覺得呢個願望好似永遠完成唔到，點解咁多難關，我當時覺得自己生唔到小朋友，所以好唔開心。」
全部朋友都知我恨嫁
因為這個瘤，當時的男友決意和阿雪結婚。曾經因為男友仍未定性不想結婚而分手的阿雪，今次卻被男友誠意打動。2016年結婚後，阿雪聽從醫生建議，打停經針控制子宮腺肌瘤，再把握時間造人。
「我要打一隻停經針，每個人嘅一生只可以打六支，因為打完停經針長期將你嘅荷爾蒙降低，會令到你日後有骨質疏鬆，所以醫生話最多只可以打六支，但係我有好多工作，我延長咗個時間打到七支囉，當時好開心將個瘤㩒番到得1cm，我就把握時間同我先生造人，好開心好幸運好好彩咁有BB囉！」
兒子Riley都兩歲了，阿雪話子宮腺肌瘤有變大迹象，現在保持住5cm大，她要長期食藥控制，「𠵱家有隻新藥，因為當其時個病仲係好新，未有呢啲藥，但係𠵱家就有新藥每日食住控制。其實我有心理準備，到咗年紀再大啲我唔諗住再生，我諗住割咗個子宮，因為醫生都話隻藥其實唔可以長期食，我都有心理準備割咗佢（子宮）！」
阿雪自懂事以來，父母已經離異，她自細由嫲嫲一手湊大，對母親的印象已經很模糊。「離婚原因我諗係佢哋年紀太輕，生我嘅時候，我爹哋都係得21歲、我媽咪得19歲。我記得細個嗰時佢（媽媽）又好似唔係好想見我，最後一次見面好似係十幾歲，之後冇再見過！」
想再見嗎？「好矛盾，真係唔識答，再畀我見番我都唔識得面對，我想像唔到呀……其實一直都冇嬲過佢（媽媽），因為可能一出世已經冇，變咗冇乜特別感覺，同埋我嫲嫲畀咗好多愛我，嗰個愛足夠去彌補，所以我冇嬲我媽咪嘅！不過都聽過一啲好難聽嘅說話，其實都幾討厭，我之前拍拖，俾對方嘅媽咪話我，『你冇媽咪㗎，你唔會係正常』，當其時感覺好難受，第一唔係我想㗎嘛，第二你話我唔正常，好似講埋我屋企人咁囉，始終你唔知我爹哋、我嫲嫲幾錫我，畀幾多愛我，我絕對唔係你所講咁缺乏愛囉！」
單親家庭成長，父母離婚並沒有為阿雪帶來陰影，反而令她更想快點組織自己家庭，「好多人都話如果屋企環境係咁，會唔敢結婚，我係掉轉，我係好渴望結婚，全部朋友都知我恨嫁！我唔理，我都想試一次係點，就算touch wood離婚，或者維持唔到，點都叫做有一個人喺嗰日承諾過同我一生一世咁行，同埋我影返啲結婚相，好渴望有自己家庭，我對婚姻好憧憬㗎！」
搭得車嚟份人工都冇
今年37歲的孫慧雪，雖然恨嫁也只是三年前才結婚，相比起父母，她絕對不算早婚之人。她2006年大學未畢業已入讀無綫藝訓班，阿雪不諱言當初純粹貪玩。
「我嗰時諗住玩吓，我仲有一年畢業，我嗰時讀緊大學（城大語文系），我讀中文，諗住出嚟做老師，或者做寫稿，我就諗第時可能要坐定定喺office，但係我個人又好怕悶，咁不如我喺做嘢之前嗰一年，搵啲嘢係好玩㗎嗰時我喺商場做DJ，即係播吓歌講吓嘢嗰啲，而我當其時隔籬個拍檔（江梓瑋），佢去咗考港男喎，報名第一屆港男，又去咗考訓練班。佢當時攞埋份表格畀我，話不如一齊去考訓練班，結果我諗住玩吓就考咗入去，完全係無心插柳。」
雖說是無心插柳，但阿雪從小已經好識諗，大學年代已經自給自足，「我細細個已經要出去搵暑期工，我細個有好多諗法，我想開時裝店，我覺得要去做sales睇吓人哋收入係點，又去商場開舖，喺我唔使返學嘅時候就出去打工。」
即使正式入行後，阿雪一樣百足咁多爪，因為單靠無綫份糧，根本不夠用。「始終要捱啦，大家都話係少林寺，其實搭得車嚟份人工都冇……因為好多時我哋拍通宵，又想多啲時間瞓覺，我好多時都會搭的士，咁又冇咗啲錢喇！我哋起薪點係五千蚊，啱啱入去乜都唔識，咪當交吓學費學吓嘢囉！之後我自己去做啲手作仔，用啲乾花去做首飾去賣，叫啲人網上WeChat我，我就去港鐵站交收，咁樣去賺錢囉，同埋有搞網購又試過去賣衫！」
以為阿雪恨上位，但在無綫多年一直都只是基本藝員約，想過會成為「親生女」的一天嗎？「其實我都好知足常樂，我覺得每個人特質唔同就有唔同嘅嘢適合你做，好似我𠵱家都有做KOL，我都好畀心機咁喺網絡拍一啲片，好畀心機去處理自己個page！」
當年由《美女廚房》粥粉麵飯的「飯」做起，到「世界妹」和「千金妹」，妹仔出身的阿雪竟然冇諗過做女一，「真係冇，哈哈，個個都話我好冇野心，我個目標係定咗，只要有一個角色俾我由頭到尾自己去諗、自己去想像，我已經好開心，我又冇諗過要做女一喎從來都……我反而好開心我可以同人講，我真係捱咗咁耐，真係捱出嚟，有好多嘢我經歷過，起碼話畀人聽我係捱得囉！」
果然係妹仔格，最緊要知碇。
【後記】富二代
阿雪的圈外老公羅天彥，一直被傳是富二代，家族經營木材生意家底雄厚。今天阿雪澄清話：「見到呢啲報道，我就莫名其妙，但係佢就好開心，無端端話係富二代喎，但係其實𠵱家時間耐咗，大家都知道唔係試過有人話，喂你老公咁有錢，做乜仲出嚟做嘢，大家見到我做到咁辛苦，就知道唔係啦，佢都係正正常常出嚟搵工嘅人，做生意每個月有固定收入咁囉，唔係乜富二代，真係要澄清吓，話佢富二代，好似有少少話佢唔做嘢，感覺唔係咁好，佢唔係富二代，我都仲要做嘢，我都要同佢一齊去承擔個家庭！」
木材生意的確是男方家人經營的，「佢（老公）係打工囉，佢同我有一齊去搵啲嘢做，譬如我哋會入一啲面膜返嚟試吓做代理，呢啲都係我同佢一齊去做嘅生意，唔係話有好大嘅生意畀佢去打理囉！」
兩人一直財政獨立，老公打工仔不用充富二代，正如阿雪天生妹仔格，幾咁夾！
場地提供：Cubus 28
|
鍾意就快D Share啦！
|
|
|
