77歲的盧海鵬一直都有糖尿病，今年初發現其中一條血管阻塞了百分之九十，最後要入院做通波仔手術。鵬哥康復得好快，早前為入行後第一部擔正做男主角的ViuTV劇集《仇老爺爺》做宣傳，還自爆開工時有向「廢青」游學修「試咪」，中氣十足。
日前《蘋果》讀者梁小姐在港鐵車廂內遇見鵬哥，她透過「爆相爆片」分享，表示當日見到鵬哥一個人，望落有點瘦，但好精神，還有力扶住差些跌倒的乘客。梁小姐說：「當日下午12點半左右，喺美孚站往中環方向嘅車廂內見到鵬哥，佢最初係企喺度，列車突然煞停，身邊一位阿叔企唔穩差啲跌低，鵬哥好好，幫手扶一扶佢。」梁小姐見到鵬哥年紀大，最後讓座予鵬哥，她說：「我發現佢冇位坐，第一個反應係見到老人家就讓，講咗句『鵬哥你坐吖』，佢都冇客氣坐低咗，仲講咗聲『唔該』。」鵬哥在佐敦站落車，梁小姐表示鵬哥全程表現得好cool，說：「鵬哥坐喺車廂左望又右望，有啲發呆咁。但見佢都好精神，喺佐敦站落車，冇拎拐杖，腰肢挺直，呢個年紀算係咁。」
鵬哥曾經歷文革批鬥，70年代偷渡來港，73年才有機會參加無綫第三期訓練班，同學包括周潤發、吳孟達及《喜有此理》的監製蕭鍵鏗等。鵬哥扮乜似乜，有「扮嘢之王」稱號，而月前ViuTV播出的劇集《仇老爺爺》中，鵬哥拍住90後的游學修飾演兩爺孫，一個做廢老，一個做廢青搞出不少笑料。《仇》劇在7月播映，口碑不俗，但當時有傳媒問鵬哥會否再拍劇？他坦言好難講：「因為自己年紀大啦，所以要好劇本，而有需要我呢個角色，先會考慮。」
-----------------------------
【撐學生】
召集有心人 撐學生全年睇《蘋果》
立即按此
|
鍾意就快D Share啦！
|
|
|