88歲的黃夏蕙是娛樂圈甚至香港的永遠的證人，由當年鄧家爭產到初一頭炷香或萬聖節，總有她出現；再說由D&G事件到化身美人魚都要守護大嶼，最近還有11月參選區議員之說。
不過證人都有缺席時，如她去了美國的這三個月，祥嫂離開了，香港也變色了，她，不在場。
說她是「殯儀之星」更當之無愧，她在美國期間，就為祥嫂安了靈位在三藩市的青松觀內，「𠵱家諗唔返起我哋點識，我哋成班好姊妹，𠵱家都死埋，鄧碧雲死咗，鳳凰女又死咗，霍林淑端（霍英東三太太）又死埋，𠵱家真係得我，我係一個種（死剩種）嚟嘅！」
黃夏蕙說：「我唔想佢哋死呀，真係寧願自己死呀，都唔想自己嘅好朋友死，喊又喊盡，𠵱家真係欲哭無淚！」
濃妝粉底眼影底下，黃夏蕙泛起的淚水更加明顯。
撰文：文嘉龍
攝影：仇志德
同祥嫂最後一餐食越南菜
祥嫂的最後一面，黃夏蕙見不到，倒是說起最後一次的見面，她現在回想，覺得是有種心靈感應般，是非見不可的，見完翌日，祥嫂就入院了，而黃夏蕙就飛了美國。
「好突然好突然呢次，佢喺花園出嚟，我費事入去拎吖嘛，佢啲狗咁鬼死惡，我又趕住，因為我第二日就上飛機，所以佢就交咗畀我（染髮水），我話咁大風叫佢唔好出嚟，我話叫工人拎畀我啦，佢自己係要出嚟，即係可能呢啲係心靈嘅感應，即係嗰分鐘就係生離死別，呢啲係感應，佢都唔知，我都唔知，如果我知，我都唔會去美國。」
回想起來更覺得那一夜入元朗為了攞支染髮水，成為最後一面，黃夏蕙說，可能是緣份，上天不想她看到病榻中的祥嫂。「其實啲洗頭水（染髮）我唔要都得啫，前幾日我拎咗好多奶粉畀佢，因為佢想食嗰隻對佢身體好，可能係醫生叫佢食多啲，我就好緊張，即刻幾日前已經買晒畀佢，我呯呤嘭𧵓買咗六罐畀佢。佢話有隻染髮水好好嘅，話買畀我，我話你唔好買，畀樽我試吓先啦，咁佢攞咗自己嗰樽畀我，佢叫我去攞，咁我就見到佢最後一面。我都覺得奇，點解人生最後嗰面會咁，一見咗第二日就入醫院喇，所以我覺得可能係感應啦，佢叫我過去，叫我快啲去攞！」
黃夏蕙說，和祥嫂的最後一餐，是大家吃了一餐越南菜。「我最記得我未去美國之前，佢話要去食越南菜，我哋唔識路，行到一隻屐咁，佢都係話要去食，我仲話唔好喇，唔知地址我哋唔好去喇，你行得咁辛苦做乜，走去間大公司，YOHO嗰度，嗰間叫做乜嘢呀，形點呀，走咗去形點，嗰次始終係食咗，嗰餐係最後」
相識半世紀的好姊妹，黃夏蕙說已記不起怎樣和祥嫂相識，只知道祥嫂17歲就已識她，那時候最常做的事，就是結伴食消夜。往事點滴，段段也難忘。
「我同佢段段都難忘㗎啦，有喜怒有哀樂，見到佢有唔開心，但係都冇辦法，人生裏面你同我都估唔到會發生乜事，我最難忘係每一次，佢搵我去消夜永遠都唔敢自己搵嘅，祥哥打嚟嘅啫，三、四點（凌晨）先打嚟消夜嘅，咁我就永遠唔敢換衫瞓覺，佢一打嚟我就落去，每晚都係三、四點呀，佢係要咁夜㗎嘛，兩點我就喺屋企等佢，咁多十年嚟我都係咁做，嗰時我住肇輝臺好近咋嘛落去佢嗰度（永祥大廈），咁多年都係咁做。」
一生中最愛胡百全
真正的最後一面，不止和祥嫂見不到，黃夏蕙口中「一生中最愛的男人」胡百全的最後一面，也是無法如願。胡百全是律師，曾任九巴、廖創興銀行董事，歷任市政局民選議員及行政、立法兩局非官守議員。
黃夏蕙18歲識他，那時他已有老婆，黃夏蕙稱為胡百全生下六名子女，當年胡百全入院，正室為阻黃夏蕙見胡百全，曾出動禁制令。「一家有一家嘅事啦，我同佢係真心相愛，當時佢係有老婆，佢個仔大我一年，我大佢個女一年，你諗吓即係我係細到咁交關。」
出了禁制令見不到，但黃夏蕙總有辦法，「用晒啲𨫥喀兵守住晒醫院，又出晒禁制令，但係𨫥喀兵都要食嘢㗎嘛，都要食飯，當啲𨫥喀兵出咗去食飯嘅時候，我就衝咗入去，看護佢哋就話你講一兩句就好走喇，如果唔係佢哋衝到落嚟嘅時候又要搞到要上差館就無謂啦，我捉住佢（胡百全）隻手同佢講嘢，我話你安心啦，你唔使掛住我，我自己有自己嘅辦法，你一定唔使掛，咁我就走喇。」
黃夏蕙說胡百全最後在醫院的日子過得很慘，正室一家為了阻她見胡百全，甚至死後也不公佈。「個老婆死咗好耐，禁制令係佢個大女（出），個老婆一早死咗，唔死嗰時都入咗老人院，幾廿年喇，眨吓眼都有三十年喇，因為佢老婆死咗，個女先至惡，老婆喺度係完全冇事嘅。我冇同佢（大婆）和睦，但係我同胡百全係日日都公開，跑馬乜嘢都係，只有佢係帶我出去嘅啫，但係入咗醫院嘅時候佢（大女）就出咗禁制令吖嘛，亦都唔畀個老竇出院，呢樣係好殘忍嘅。」
做二奶多年的黃夏蕙，從未諗過坐正。「都唔需要啦，個老婆都喺醫院不省人事，即係癡呆嗰啲呀，癡呆咗成廿年，然後都死埋啦，我唔使坐正，我唔需要，我都唔要名份，使乜要名份啫，我啲仔女係有晒名份就得，我亦都冇諗過去爭，我係好平靜咁同佢一齊，點知道佢老喇就俾人蝦。」
08年胡百全去世，黃夏蕙說她可用胡百全的基金，但一直未進行相關程序，到去年夏蕙慈善基金正式獲發慈善牌，她說今年會攞返啲基金。「佢係有個基金，我又唔想俾人話我係爭乜爭乜，我係冇嘢爭，因為啲基金佢係留咗畀我，仔女同我都有份嘅，我諗住呢次喺美國返嚟，我都要開始攞返啲嘢喇，因為我自己有個慈善基金，我攞到啲錢已經可以唔使點樣籌喇，先將自己嗰啲擺上去，乜都做到啦，我一早就諗住做老人院，因為我覺得啲老人家係最慘，老起上嚟乜能力都冇，因為我先生就係因為年紀大咗，俾人秤咗入去醫院就唔畀佢出院，出晒禁制令唔畀我哋一家人去見佢，嗰時我都好慘。」
三藩市青松觀買靈位
除了胡百全，黃夏蕙還有另一個男人，就是賽車手潘炳烈，潘是做警察出身的，他與黃夏蕙的邂逅，就是在警局。
「有啲人打爛我架車，我去報案咋嘛，咁就識咗佢，總之情愛就係好麻煩，可能係胡百全啲女人打爛我啲車，咁我咪去報案囉，報案識咗佢，冇事㗎喎大家都，大家都唔記得咗呢件事。因為識咗佢都冇用，因為佢有老婆，你明唔明呀，咁又點得呢？佢有老婆，我又有老公吖嘛，大家各不相干，咁麻煩嘅嘢無謂做，我亦都好專心為胡百全。」
眼見一個一個老朋友和至親離去，黃夏蕙很痛心。「我好痛心，我去咗三個月（美國），第一個就係祥嫂，祥嫂我係最傷心，我同佢已經喺三藩市青松觀嗰度安咗同祥哥靈位，等佢都可以安安定定」
還有夏萍，「我一落飛機就去拜祭佢，因為夏萍都係我相熟嘅朋友，雖然冇祥嫂咁樣日日相見，但係佢嗰時結婚，我都有同佢先生佢哋一齊玩，嗰時夏萍好精靈，我哋成日都一齊食飯，粵語片年代同夏萍都有好深嘅感情，碰一聲又話冇埋；梁舜燕就更加係啦，呢幾年我哋成日都做義工，佢又唱嘢，我又唱嘢，我都好為佢淒涼，因為佢先生同個仔都唔喺度，佢每一日都帶住隻狗去佢個仔個墳場拜祭，後期冇幾耐佢先生又死埋，佢個人都好傷痛。」
去年的吳君麗，「吳君麗更加係我哋大家同一段時間，直頭係成日大家都相遇，所以你諗吓幾咁淒涼，所以我諗諗吓希望我有生之年，做多啲我應該做嘅嘢，因為我年紀都大喇，我所有嘅好朋友差唔多都去晒喇，覺得性命真係冇得講，真係冇take 2！」
在三藩市青松觀內，黃夏蕙也有為自己安排。「我都買埋自己個靈位，喺佢（祥嫂）側跟，同佢做伴啦，即係生前唔見喇，將來都可以同埋一齊，我嘅心願。」
【後記】林鄭觀音二選一
說到要選區議員，黃夏蕙不置可否，「如果選特首我就去選，其他嗰啲我都冇諗過，考慮緊啦，好多嘢唔係你話做就做，你話做特首就唔同呀，畀我即刻選㖭！」
黃夏蕙說萬事以和為貴，「唔掂講到掂，大家開開心心，萬事都以和為貴。我喺美國睇到好驚呀，我都驚返唔到嚟呀，但係我都要返，香港始終係我嘅家，我話唔怕嘅，香港係我家，我始終都要返嚟！」
遊行她一定支持，年年支持的，還有哈囉喂，今年又扮乜？經理人在旁提議，「不如你今年扮林鄭」「唔扮，我做乜要扮佢？」「唔扮林鄭，咁扮觀音！」「觀音我就扮！」
極邪惡與最慈悲，人老精鬼老靈的夏蕙BB，當然識選！
場地提供：Mr. Crab by The Captain's House
|
鍾意就快D Share啦！
|
|
|