剛開完兩場伊館騷的莫鎮賢，聯同黃翊、何婉盈和文佩玲等九位「新秀同學會」，不知那日再重聚。莫鎮賢說，完了這場騷，也要為年尾的個人演唱會籌謀。
85年出道，莫鎮賢未曾大紅大紫，說退出也不止一次，原因離不開一個情字。當年與外籍前妻感情生變，再遇上另一段沒結果感情，都令他無心戀戰。其後，忘記她是他，莫鎮賢愛過同性，「我感情世界裏面試過同男性交往、試過同女性交往，當中我所要嘅嘢，佢哋都畀唔到我！」
06年他最疼錫的胞妹在南非遇上車禍喪生，更令他頓悟愛情世界的虛空。他說，妹妹急於去南非，是為了會合她的外籍未婚夫；車禍後不到一年，莫鎮賢的「妹夫」另娶她人了。
單身十多年的莫鎮賢，經歷妹妹離世打擊後潛心向佛，「我啱啱先同屋企人講，我唔知有冇一日突然間……我會出家。」三個月前才到西藏修行的莫鎮賢如是說。
撰文：文嘉龍
攝影：林賓尼
| | |
感情背叛係冇分男女
莫鎮賢的成名曲是《情罪》，當年他的退出，也是為了愛情。「嗰時我有一個外籍女朋友，佢喺三藩市，我係喺日本（留學）同佢開始，後尾去咗美國發展，我好唔習慣香港娛樂圈嗰種作息嘅生活，我做咗一、兩年就走咗，跟住去咗三藩市。可能真係太細個，其實我哋（已經）結婚，係一個好差好差嘅經歷，但係好幸虧嗰時華星有個監製打畀我，佢叫我返嚟香港，叫我幫佢參加一個歌唱比賽。」
三藩市前妻後來和莫鎮賢的一位好兄弟交往，「後尾佢同咗我一個好好嘅兄弟一齊，anyway，喺我年輕嘅世界我接觸到其他異性嘅approach，甚至乎有男性嘅approach！我感情世界裏面試過同男性交往、試過同女性交往，當中我所要嘅嘢，佢哋都畀唔到我。我係一個怪嘅人，唔係睇一啲得益嘅嘢，譬如情感肉體嘅得益，又或者利益上嘅得益，我唔睇呢樣嘢，首先一定要同我溝通到。」
男女都愛過，莫鎮賢說，男的有時為肉體求快餐，女的有時為金錢要苛索。「我返到嚟香港，女仔我又拍過幾個，有一個後尾我試過同佢同居，佢不停同我索取好多嘢，後尾我同佢分手，我好記得我去嗰個騷，佢就喺門口同我攞錢，直到有啲同門師兄弟同我講唔得，公司亦都知道有呢個人嘅存在。佢覺得我係你條女呀（要錢），但係嗰時我同佢分咗手喎，我試過好多呢啲人；又試過有男性approach我，我試過同男性相處啦，佢哋亦唔係我要感情嗰樣嘢，好多想食『快餐』，有啲可能行一陣就會淡，我唔係，我係慢慢build up！」
對女人失晒信心？「我有曾經咁諗過，原來背叛係冇分男女，同埋感情操控或者不公平，都係冇分男女。感情就係感情，唔係男人就係女人啦，你嘅對手，我覺得要睇每個人嘅際遇同境況。」
莫鎮賢說，今次「新秀同學會」的演出，同場還有黎明詩，他說大家的境況很相似，「我個心態𠵱家有少少似佢，都係婚姻曾經失敗過啦，佢之前拍拖各樣嘢，跟住輾轉失敗咗，自己又放棄咗，又過咗一啲歲月，突然間出現咗個人對自己好好，點知嗰個係女性！反而我冇諗呢樣嘢，如果突然間出現，我唔知呢，我諗我會完全唔介意係男性定女性。」
我嘅生日就係佢嘅死忌
與前妻離婚後，89年莫鎮賢重回樂壇，到了95年再為了另一段感情問題，完全退出娛樂圈。這次退出後，他和胞妹開始合作做半寶石生意，直到06年妹妹在南非遇上車禍意外。
「我睇到佢（妹妹）有我嘅影子，佢對感情嘅執着，去到最尾因為佢嘅未婚夫喺國外等緊佢，佢都等唔到哥哥同佢一齊去。因為我哋要去一個business trip，但佢要快快會合佢嘅未婚夫，我就話你個未婚夫又唔係識咗好耐，係咪值得呢？去到兩個就遇上車禍，喺非洲Namibia納米比亞，咁可以點啫？」
原先兩兄妹的公幹目的地是到南美哥倫比亞，兩人要到石礦場視察，莫鎮賢曾勸說妹妹不如待半年後兩兄妹才一齊出發，但陰差陽錯就是妹妹心急飛去南非見未婚夫，獨自起程。「佢等唔到就係好想快啲去咗南非，會合佢未婚夫先，都係感情多於理性囉！」
妹妹飛到南非發生意外，正值是莫鎮賢的生日。「係整定嘅，嗰一年我生日慶祝緊，就係等緊佢打返嚟，後尾太夜喇，我送咗爸爸媽媽上車返屋企先，我哋後生仔就去卡拉OK切蛋糕，就喺嗰刻我電話收到，係一個死訊，並唔係一個birthday greeting囉，係一個死訊，佢啱啱死咗斷咗氣，就喺我嘅生日，所以我嘅生日就係佢嘅死忌！呢件事影響得我好深，我好記得我嗰晚知道咗之後係暈一暈，我聽唔到個電話，佢個fiancé（未婚夫）打嚟，佢哩哩嚕嚕，我以為佢哋知道我生日，阿哥未飲醉，你哋就已經飲醉，原來佢哋遇咗車禍。佢係白人鬼佬，架車已經翻滾又再翻滾，我妹妹斷咗頸骨，佢就半條脷咬斷咗，佢打嚟嘅時候佢講嘅嘢，我係聽唔清楚，我以為佢飲醉酒，原來係斷咗半條脷。」
莫鎮賢當刻同自己講，不可以喊，要在太陽日出之前，處理好所有心情，還要面對怎樣向父母交代。「打電話叫我哥哥出嚟，我話咗畀佢聽，天光醒要返去爸爸媽媽屋企，點樣同爸爸媽媽講呢一件事。我𠵱家回想返呢一件事，到呢一刻係我人生中最難一個抉擇一個動作，就係告訴爸爸媽媽，妹妹嘅死訊。嗰時爸爸媽媽住跑馬地，我返到去首先叫哥哥將所有窗閂咗先，跟住叫佢哋坐低圍住㩒住佢哋先，講咗呢件事出嚟，我爸爸就喊，我爸爸好錫妹妹，妹妹最細吖嘛，全家人就攬住一齊喊。嗰個場景我見到我爸爸媽媽喊，我睇戲先見到呢啲場面，竟然喺我屋企裏面發生咗。」
隻身到南非再經當地中國領事協助，到達路途遙遠的沙漠殮房領屍。「後尾要出境呀要解剖呀，好多好多繁文縟節要做，返到嚟所有身後事辦晒，安頓晒所有嘢，我哋搬離咗市區，直頭同我爸爸媽媽搬咗去新界住，想佢哋盡快忘記，唔想佢哋觸景傷情。之後又到咗我自己有抑鬱症，好難先至跳返出嚟，其實嗰刻再refer返感情世界嘅嘢，我已經好冷感喇！原來你用咗咁多力氣去追尋自己嘅夢想，亦都追尋自己嘅愛情，但係愛情同夢想追尋所出嘅力，太唔balance，虛耗咗好多事業上嘅黃金機會，但係感情亦唔見得有好大嘅收穫。」
與梅艷芳的結緣與鬧翻
54歲的莫鎮賢，大半生追尋愛情為親情付出，錯過了不少娛樂圈的發展機會。他年少時已自己儲錢到日本留學讀時裝設計，多年來亦做過不少生意，開時裝店餐廳酒吧等等，而唱歌興趣由從小跟父母到酒廊消遣開始，那時候在酒廊就認識了梅艷芳。
「我爸爸媽媽好細個結婚，佢哋好貪玩又好鍾意音樂，我好記得我細個會去尖沙嘴嘅酒店Lounge，佢哋去同啲朋友聽歌飲酒，我就成日走去人哋個鋼琴度，我冇記錯嗰個應該係Carpio Family，即係Teresa Carpio（杜麗莎）個family，我唔記得係佢uncle定爸爸，嗰時我好細個又識得唱吓歌，我諗係小學十歲八歲，有隻歌係奇里夫李察（Cliff Richard）叫《Summer Holiday》，我就學咗呢首歌去參加唱歌比賽就攞咗獎。」
莫鎮賢十四、五歲就當上酒廊替場，那時候的梅愛芳、梅艷芳兩姊妹已是酒廊界紅人，梅艷芳之後參加第一屆新秀得了冠軍，莫鎮賢則到日本留學，是阿梅打電話叫他回來再參加新秀的。「我記得我臨出台嘅時候，梅姐真係好好，人真係會有偏心㗎，佢沖咗兩碗開聲茶，一杯畀杜德偉、一杯畀我，其他人話點解我哋冇㗎？我話唔知呀，臨出台佢又叫我入去佢化妝間，整吓我隻眼整吓我個嘴，得喇，你出台啦，我一睇，原來佢幫我化咗一個紫白色嘅唇膏同埋一個好妖嘅眼影，啱啱襯咗我套衫，最後攞咗個舞台發揮獎（最突出台風創新獎）！」
與梅艷芳結緣，可惜卻為了一件事令二人鬧翻，至阿梅死前兩人都未解心結，又是莫鎮賢的另一憾事。「我話我誓不往來呀，嗰時佢發生咗一啲事，係掌摑嗰件事（92年梅在夜場被黑幫掌摑）。好多artist喺VIP房，佢哋話梅姐喺嗰度，你唱完入去睇吓佢啦，我太細個，當下我關心嘅方法不到位，𠵱家我長大咗就知道，幾廿年前，佢都唔想提，嗰日有影帝喺度㗎，佢哋好成熟咁去安撫緊佢，你就嚟到霹靂啪啦咁講，問點樣呀乜嘢人嚟㗎有冇報警呀乜乜乜呀，我好緊張，其實我係一個關心，可能我太細個唔識得處理，佢鬧咗我幾句，我覺得好冇面，我話我以後都唔會理，反枱咁滯我就走咗喇！」
俱往矣。如今梅艷芳在省善真堂的靈位，安放在她對面的，正是莫鎮賢胞妹的靈位。莫鎮賢09年為悼念妹妹作了一曲《約定天國》而復出，他說這十年間他以藝人的工作為副業，「𠵱家我藝人嘅身份係一個副業，因為我自己係一個佛教徒，我創建咗一個義工團體，14號（昨日）我就帶住我嘅團隊去做助學，年尾喺香港亦都會有一連串嘅慈善活動。」
每年都會去西藏修行的莫鎮賢，心如止水潛心修佛，正規劃人生的下半場。「我啱啱先同我屋企人講，我唔知有冇一日突然間我會出家。我有好多角色，我又係一個歌手，做咗呢個節目（《流行經典50年》），又應承咗做呢個演唱會，又有第二個主辦商叫我開個人演唱會，我會唔會好好咁捉住自己僅餘嘅青春尾巴，做一啲舞台上興趣上嘅工作，喺下年完結，咁後年我就去規劃我人生下半場係應該點樣走囉，會唔會嗰時嘅緣份就係一個修行？」
【後記】我爸爸係一個警察
莫鎮賢從小在黃大仙警察宿舍長大，「我屋企好嚴，我爸爸係一個警察，由細教我哋好似軍訓咁，我明佢係錫我哋嘅……我好多年前就好獨立！」
莫爸爸早已退休，作為警仔的莫鎮賢，對於現在的克警與示威者的新聞畫面，他說：「我喺facebook都有話我好擔心。話我係廢老都好，我永遠喺心裏面係冇廢青，只係有好多顆好年輕好熱血嘅心，好想為香港做啲嘢，我都熱血過，我好尊重佢哋，希望佢哋平安，咁我亦都希望警方可以好合法好理性地去處理，雙方面我都有個訴求，就係希望唔好（再）有太多流血事件囉！」
南無阿彌陀佛。
場地提供：Porterhouse
|
鍾意就快D Share啦！
|
|
|