「李佳芯男朋友」陳炳銓早前接受訪問，為他主演的ViuTV劇集《理想國》宣傳，回想張晉憑《一代宗師》馬三，擺脫「蔡少芬老公」稱謂、張繼聰最後亦順利「認祖歸宗」，不再「謝繼聰」。論名氣陳炳銓不及擁視后名銜的女友，有網友就以「嗰個茄喱啡」稱呼陳炳銓，痛過傷過自言忍痛能力特高的他，確實跟過「霞姨」搵食，做過臨時演員，他說︰「嗰陣同時做緊幕後、舞台嘅時候，都有做啲老臨特約，都幾得意，第一次拍係同吳鎮宇、容祖兒套《神經俠侶》，當時係過鏡，唔好講角色，只係街坊行過。之後第二套係張栢芝、劉青雲嘅《最愛女人購物狂》，嗰次就升級做咗特約，做個security阻住青雲唔畀佢入去。」他表示特約跟臨時演員的分別，臨時演員未必有對白，鏡頭亦未必拍到，價錢會較平、約300元左右，他說︰「特約由88蚊起錶，一定有飯盒嘅，唔好講得咁慘。帶我嗰個唔係『霞姨』係陳太。後來先發現間公司係田生田啟文有份開，原來佢做過我老闆。」他演出過的電影包括《八星抱喜》、《大搜查之女》等。
雖然學院資歷一點也不輸蝕，在加拿大的大學畢業，主修舞台設計及後再進修表演藝術，但知名度始終有距離。外貌亦是網友攻擊目標，每趟訪問都會「搭單」問起女友︰「嗰啲唔會刻意在意，我知發生緊乜嘢事，早喺我介唔介意之前，已經stop咗佢。本身比較捱得小小痛，都會痛嘅，人嚟嘛。你話唔面對又好、逃避都好，睇完個標題就算。喺佢冇咁紅時，已經學習緊乜嘢叫工作同壓力。只可以話每個人有唔同嘅步伐，我哋行嘅步伐有分別。而方向都有分別，唔可以咁秤。你唔可以話紅豆沙好食過綠豆沙，唔會咁樣比，只有各自各行嘅路。係有啲淡口啲，有啲濃口啲嘅，咁咪work囉。」講到「李佳芯男友」是一個不能逃避的身份，他說︰「我唔介意係其中一個身份，我會覺得喺娛樂圈，可能透過呢個位，就算冇睇我啲劇都可以開始認識，我唔concern係咪李佳芯男朋友嘅身份。」
在ViuTV的《理想國》其中一個單元，戲中陳炳銓可以選擇消除記憶，現實中他想所消除的，或許是童年成長的陰影，他說︰「我11、12歲去咗加拿大讀書，喺親戚屋企住。寄人籬下，總有啲心情唔協調，會亂諗嘢。當時係媽咪問我去唔去外國讀書，我話『梗係去啦』，其實佢係驚我唔識獨立，而佢係有啲事要處理。事後知道原來媽咪有cancer，做完手術至話我知，又同我講啲身家托管咗畀邊個。」陳炳銓形容該段日子是急速成長，過程中總會亂諗，可以「消除」會是最好，但不諱言某程度，令自己更加硬淨︰「黑人朋友、白人朋友總會有唔同歧視，都係訓練緊你EQ，因為你要適應緊人哋地方，你要入鄉隨俗，要瞭解人哋價值。當然亦唔可以扭曲自己。一步步train番你，對自己有提升，訓練成我比較捱得小小痛，都痛嘅，人嚟嘛。」
陳炳銓捱得痛，凡事去到盡，運動場上一個字「博」。踢波搏最後斷腳收場，斷十字韌帶、半月板撕裂，打籃球搏，後果是膝蓋移位，他輕描淡寫的說︰「玩運動我好投入，唔收嗰種，而家兩個膝頭都做晒手術。」他不諱言是借運動去發洩壓抑的情感，最後要借15年一部自編自導自演的舞台劇《玩死卓別靈》釋放。陳炳銓將童年到長大一段未能釋懷的情感傾注劇中，作品完成他亦跟過往告別︰「又唔可以話埋葬，係將啲壓抑、搞唔清嘅喺個騷度講出嚟。」
另外，女友因在網上支持反送中，被內地網民聲討，同時被公司雪藏，作為男友的陳炳銓說︰「未去到好瞭解，公司都同佢處理緊，留番畀佢講會準確啲。」
-----------------------------
【撐學生】
召集有心人 撐學生全年睇《蘋果》
立即按此
|
鍾意就快D Share啦！
|
|
|