喜歡骸骨與屍蟲，熱衷在骨頭中尋找真相，為亡者鑑定身份，29歲的李衍蒨Winsome是香港罕有的法醫人類學家。神秘面紗下，她喜歡比卡超，為邪流丸公仔戴上四方帽，拿起Longchamp手袋，手戴水晶鏈，是個土生土長的港女。反送中運動中，那管是勇武或和理非，人人希望透過自己專長，為抗爭出一分力，但見盡墳場、亂葬崗、戰亂之地的她，「只希望我嘅專長，冇用得着嘅一日」。
記者：李錦欣 攝影：趙浩宜
「佢好沉默、好誠實，唔會隱藏掂到佢嘅事，係個比較坦白、容易溝通嘅對象」，Winsome彷彿在形容的「伴侶」，是藏在我們身體內的206塊骨頭。對軟組織（即肉身）無興趣，偏偏對骨頭情有獨鍾，家中放滿骷髏頭擺設，床邊更有個座枱式人骨模型擺設，「越研究得多，就好想俾呢啲嘢包圍，側邊都係自己好熟悉嘅嘢，感覺好良好」， 她哈哈地大笑說。
天生樂觀又愛笑，朋友也說她大癲大肺、笑點低，惟有提起工作，Winsome才會收起笑容耐心解釋。香港只有法醫，沒有法醫人類學家，普遍香港人知道能利用骨頭查案，可能是從美劇《Bones》（港譯《欲骨查》）開始。法醫旨在尋找死因，法醫人類學家則透過骨頭、腐爛的屍體，進行身份鑑定工作，與劇集不同的是，「唔係淨係話單一查案咁簡單，喺啲大型災難事件，都會用得到呢啲技巧」。由美國的殮房、塞浦路斯的墳場、索馬里及東帝汶等戰後地方，也有用得着Winsome的地方。
平日工作時，她如考古學家般彎下身軀，挖掘並掃走泥土，尋找屍首。工作環境惡劣，日曬雨淋，工時更長至朝4晚5，「甚至有時最簡單人有三急，唔好諗住有廁所，可能得兩個窿」。都市傳說下，香港處處是亂葬崗，Winsome憶述初次「拜訪」的亂葬崗，位於曾經歷戰亂的塞浦路斯。該處約600呎大，大得要分成6個區域處理，除了骨頭，還是骨頭，到底有多少具屍體？她說無從判斷，只能辨別「至少有幾多人」。
這種震撼沒有嚇怕Winsome，反而令自小志願多多的她決心安定下來，「我自己鍾意做人道主義為主嘅工作，或者災難性工作為主。有時做呢啲工作，或呢啲Mission（任務），提醒返我每人都係獨一無二」。日前有青年在太子街頭問防暴警「係咪跌咗良心」，結果被毆至頭破血流兼被捕，「有冇良心良知，唔會餵飽你，可能冇乜實際用途，但自己比較追求呢類價值」。
頭骨易碎 眼窩骨如薯片般脆弱
眾多個案中，令Winsome最深刻的是一個有至少3處刀傷的頭顱，其後尾枕亦撞凹，傷勢分別於不同時間造成，已逐漸康復，「好震撼嘅原因係因為所有傷集中喺頭部，只係手臂有叫做擋過下嘅痕迹」。惟獨眼窩傷口並無癒合，推斷是死時造成，「我哋見到眼窩位有少少好似子彈飛過，但喺後面搵唔到子彈出嗰個位」。可惜的是，死因始終無法確定，她承認法醫科有其限制，「你可以知佢發生咩事，但背後嘅經歷、細節，我哋係冇可能知」。
眼窩受傷，令人不禁聯想起被布袋彈射中至爆眼的少女，「眼窩入面呢堆骨，好脆好薄」，Winsome形容厚度如薯片，較薯片硬身少許。她專業地講解：「我哋教學生拎骨頭，特別係頭骨，大家都會好想直接地拎（以手指穿過雙眼眼窩骨），一定唔會畀佢咁樣。」她強調頭骨必須雙手捧起，否則容易損毀，「你諗吓更何況係粒彈珠打過？」
六月飛霜，烽煙槍聲四起之時，Winsome正在波蘭上課，「上堂睇直播最辛苦，因為想喊又唔喊得，好緊張好激動」。錯過不同階段的遊行、連儂牆的崛起，既焦急又內疚，「會覺得自己點解唔喺香港而喺外國嘅呢？」後來再到曾經歷戰亂的塞浦路斯工作，兩個多月來，只能透過facebook及IG做文宣，向來自不同國家的同僚講解。臨別前，每個人最後的話也是：「你哋一定要加油！」她輕嘆一口氣，「好感動，原來真係全世界都睇到我哋做緊嘅嘢」。
重踏這片土地，已再不一樣。身為一個法醫人類學家，讓亡者安息、令在生者釋懷，是她最大的使命。Winsome坦言不希望自己的專長用得着，「始終我嘅專長同好多被滅聲嘅屠殺事件有關」，這種專長，代表更大型、更震撼、更悲劇的事已發生，她頓了一頓再說：「相信大家都唔會想走到呢一步。」
法醫人類學家人工低 「唔會發達」
香港教育制度下的哲學系，是水泡科，從就業角度來說，也是學生們戲稱的「乞食科」。科學背後的Winsome，想不到是讀哲學出身。不過，別以為擔任法醫人類學家便能賺大錢，她笑言：「呢啲唔係會發達嘅Position（位置）。」
每次工作薪水不一，視乎由哪個機構主辦，例如為航空公司處理空難後的情況，大概有2000元一日，但假若是非牟利機構的話，每月可能僅得6000至7000元，食宿機票亦不一定有，「但真係冇法，因為佢哋funding（資金）係咁多就咁多」。
自小喜歡偵探小說，看《十萬個為甚麼》也選人體篇，中學讀理科的Winsome曾想過當法醫，惟法醫科隸屬醫學院，整個課程需時13年，「知道自己點努力都入唔到醫學院」，遂就此作罷。在美國讀大學時修讀哲學，機緣巧合下選修體質人類學及法醫人類學概論，令她愛上骨頭，其後在中大攻讀人類學文學碩士，於美國殮房實習後，再到英國修讀法證學及鑑證科學研究碩士，走上法醫人類學家之路。
Winsome的新書分享會中，其中一個23歲的參加者Jodie同樣熱愛骨頭。Jodie表示DSE不夠高分，但很希望成為法醫人類學家，而到外國讀書暫時是唯一出路，於是向Winsome取經，「香港喺呢方面嘅資訊真係好少，所以睇完本書，知道條路點行，對發展好好多」。
即使「得返棚骨」，骨頭一樣會說話。死者的性別、年齡、種族、身高，甚至醫療背景、生前創傷等等，法醫人類學家都可以從骨頭中追溯得到，從而鑑定其身份。雖然以死去的人及骨頭做研究，「但我哋做出嚟嘅嘢，唔係用喺死人身上」。Winsome指法醫科層面上保存骨頭屍體，繼而保存死時的病原體，從而可推斷疾病的演變，並非只用作查案及鑑定身份，故認為香港應引入法醫人類學家。
【撐學生】
召集有心人 撐學生全年睇《蘋果》
立即按此
你敢爆，我敢獎！ 立即WhatsApp《蘋果》24小時爆相爆片熱線或致電：63836568
| 李衍蒨Winsome是個法醫人類學家，也是個支持反送中運動、土生土長的港女。 | | |
| | | |
| | | |
| | | |
| | |
|
鍾意就快D Share啦！
|
|
|