肥媽（Maria Cordero）立場鮮明，經常公開撐警，曾苦口婆心說︰「以後呢個家係你哋㗎，後生仔。」而近日一位聲音似足肥媽的後生仔，在尖沙嘴天星碼頭唱着一首二次創作的歌曲《肥媽有話兒》，當他唱着︰「好心啦，啲黑警，有乜辛苦，日日打黑色衫，打黑色衫，我哋嘅後生仔。」贏得現場一片歡呼聲。
這位被稱為「尖沙嘴肥媽」的後生仔，原來是23歲的城大學生阿肥（李嘉晉）。日前阿肥在尖沙嘴接受《蘋果》專訪，對於他這段街頭busking片，而成為網絡紅人，他也意想不到︰「真係有啲驚喜，我記得嗰日係928大遊行，我只係客串吓，冇諗到有人拍咗條片擺上網，又咁多人睇過。」對於肥媽的印象，他笑謂︰「對肥媽冇乜印象，不過呢個朵（尖沙嘴肥媽）我幾鍾意個名，幾搞笑。」
喜歡唱歌的阿肥，已有4、5年街頭busking經驗，又曾組成組合「五花腩音樂」，沒想到自己模仿肥媽的聲線，才令他廣為人識，他說︰「好耐冇見嘅朋友都pm我，但唔係咁開心，畢竟我係個玩音樂嘅人，冇諗過因政治紛爭，先至俾更多人認識，有喜有悲。」訪問當晚，阿肥再次在天星碼頭busking，更遇到他多年沒聯絡的中學同學陳先生。
這位90後的年輕人，在街頭唱着《肥媽有話兒》，問阿肥有沒有擔心會被拉？他坦言︰「唔擔心得咁多，而家着黑衫、戴口罩都係理由嚟拉你。就算唔着黑衫都會俾人打，但我鍾意着黑衫，因為顯瘦，所以我唔會因為白色恐怖而唔着黑衫。」阿肥在這場運動中的理念，跟家人相反，「當初一開始同家人係有爭拗，所以我哋約法三章唔談論，我明白大家立場唔同，好難三言兩語改變想法，但我覺得社會現實，比起我哋把口更有說服力。」
正在城大修讀環球商業系四年級的阿肥坦言，跟他喜歡音樂截然不同，他說︰「讀大學都係滿足家人，點解揀呢科？因為我唔喜歡其他科目。」阿肥笑言由幼稚園開始喜歡唱歌，中學時經常參加校際比賽，到2017年他參加大專聯校歌唱比賽勇奪冠軍，對唱歌越來越有要求的他，近年跟老師學唱歌。談到將來會否想在歌唱方面發展？他說︰「我想㗎！但知道做歌手唔係咁易，除咗唱歌又要睇你package同樣貌，即使靚仔靚女都要睇吓你貼唔貼地，做唔做到歌手，隨緣」
談到現今的歌手，阿肥除了模仿肥媽了得外，他也模仿過郭富城，更曾喜歡過歌手張敬軒，為何說曾經喜歡？阿肥坦言︰「我喜歡佢之前好敢言，唔怕任何嘢，講自己想講。但近排發生啲嘢，令我對佢改觀，喺呢個運動之後，佢可能唔係真心，但犧牲自己想講嘅嘢，我覺得為世所逼而寬恕你，咁對其他嘅人係好唔公平。」刻下他更欣賞黃耀明，他說︰「明哥係一個敢言嘅人，佢係樂壇前輩，已經係收成期，但佢反而踏入政治氛圍。」
問到阿肥將來有機會當上歌手，會是個怎樣的歌手？他說︰「我唔會做一個……被迫講自己唔想講嘅人，更唔想做一個被人控制嘅扯線公仔，我想做番一個人，一個自由地做自己嘅人。」若果未能入行當歌手，阿肥最想當一位老師，他說︰「教育係會影響一個人成長，成為一個點樣嘅人，取決於細個時得到啲乜。」
說起教育，連月來的抗爭運動，有人歸咎於通識科，阿肥笑謂︰「好搞笑，一開始好多人鬧，就連老師都反對；到而家老師為咗學教通識科，佢哋付出咗好多，竟然要推倒重來，呢個政府係咪好荒謬呢？」阿肥指自己是修讀通識科的過來人，坦言要掌握這科是困難，但並非一個學科可以影響這次運動，他說︰「網上都可以接收好多資訊，其實政治就係眾人之治，作為老師係唔能夠避談政治，老師更加要話畀學生知，乜嘢係是非黑白。」
最後問到阿肥，他日若有機會見到肥媽真人，他這位「偽」肥媽想跟對方說甚麼？他看一看手上肥媽的頭像說︰「你可唔可以同我一齊唱《肥媽有話兒》呀？」
| 攝影︰沈健程、林賓尼 | | |
| | | |
| | | |
| | | |
|
鍾意就快D Share啦！
|
|
|