2019年11月3日 星期日

【葬禮抱遺體釋懷】愛犬離世 小儀有傷痛後遺:抗衡情緒令我身心透支 __,小儀,

寵物葬禮,對毛孩主人小儀而言,唔單止係最後道別,亦係一種釋懷。6.12,係港人落淚嘅一天,同時亦係小儀送別愛犬DeeDee嘅日子。愛犬離世四個月,小儀 ...




寵物葬禮,對毛孩主人小儀而言,唔單止係最後道別,亦係一種釋懷。

6.12,係港人落淚嘅一天,同時亦係小儀送別愛犬Dee Dee嘅日子。

愛犬離世四個月,小儀至今未能平伏。「睇番啲相或者勾起一啲回憶,都會不其然流眼淚,始終都只係幾個月時間。」

獨女嘅佢,視兩隻分別15歲「Dee Dee」及7歲「細佬佬」嘅芝娃娃如親細佬,「姊弟」情深。

「我對Dee Dee感情較深厚,因為係我人生第一隻養嘅狗,同佢相處咗十五年,仲要係幾個月大就嚟咗我屋企,湊仔一樣。基本上好多生活點滴都同佢有關,最初唔會諗到佢十幾歲就會走,覺得佢會一直陪住自己。再加上Dee Dee曾經陪我經歷搬屋、失戀、親人離世,所以好難捨得佢走。」

兩年前,Dee Dee開始患有腎病,每日親自幫佢滴皮下水,餵藥嘅小儀,以為自己有晒心理準備,面對每況愈下嘅Dee Dee離別。

「最初都以為自己會無事,以為自己控制到情緒,Dee Dee走咗之後三日,我都請咗假,因為當自己一個人靜落嚟嘅時候,就會流眼淚,基本上每晚臨瞓前都會喊。

當時我感覺到自己身體狀況沉得好緊要,好痛,嗰種痛好似心入面被大石壓住,唔知點樣表達,感覺好辛苦。」小儀說。

正當為Dee Dee喪禮惆悵,好友張敬軒成了Dee Dee善終解決師。

「張敬軒係今次Dee Dee喪禮嘅顧問,點解會搵佢幫手,因為張敬軒本身都係過來人,佢都係好錫狗仔,亦曾經搵過好多公司幫自己狗仔辦身後事。佢話呢間公司有少少唔同,例如會令狗仔走得有尊嚴,同埋唔會將遺體處理到變僵硬,因為佢見過朋友嘅狗仔遺體係雪到硬晒,成件事感覺好恐怖,啲牙又同平時好唔同,但呢一間會令狗仔遺體感覺好似瞓咗覺一樣。」 小儀估唔到,喪禮上再一次抱住Dee Dee遺體,為佢帶來安慰。

「當日去到推開門,見到Dee Dee喺個籃好似瞓緊覺,佢同平時瞓覺一樣,成個身都好軟熟,只不過體溫係冰冷而己。其實我最初唔敢抱佢,始終都係第一次,怕唔知會點。但身邊朋友同我講,當初同佢愛犬道別時冇抱佢,令佢一直好後悔。其他人都叫我唔使怕,佢哋話Dee Dee會知道嘅,咁我就抱起佢,當我一抱又爆喊,講得衰啲嗰句,嫲嫲唔喺度嗰一刻我都無喊得咁厲害,但爆喊完整個人感覺輕咗。

同埋我有聞佢啲手仔腳仔同個嘴,其實諗番轉頭可能有啲唔衛生,因為始終都係一個屍體,但當刻我都唔理喇。好開心佢嘅氣味仍保持住,亦發現原來再次抱住佢,竟然俾我有好大嘅安慰,因為係最後一次擁抱,又同佢講一啲我倆之間嘅說話,真係要講,因為總好過鬱喺心裡面。慶幸我選擇咗咁做,否則無做我會好後悔,無得再抱,佢已經變咗骨灰,就算之後我去擺骨灰嘅地方,攞住佢包骨灰,但感覺已經唔同。」重提與Dee Dee道別,小儀再一次落淚。 掛住Dee Dee,連頭七回魂,由原本七七四十九日,伸延至依家四個月。

「軒仔話覺得動物呢一刻會返嚟,不過需要有啲光,嗰一點光就係帶領佢返嚟。所以我如以往Dee Dee病緊時候,喺廳開着同一盞燈,再加多一盞用電嘅小蠟燭,直至而家都有開着,軒仔只係提議擺七七四十九日,但我諗呢一年都會一直著住呢盞燈,因為我心覺得舒服啲。而家枱面都有放一啲佢鍾意嘅零食,例如餅同乾糧,有個放喺地上嘅兜,我都驚細佬會偷食,但好神奇,佢(細佬佬)真係無食過,真係好得意,狗狗係好有靈性,佢知啲嘢係屬於哥哥。」 處理完Dee Dee身後事,小儀無諗過出現傷痛後遺症。

「當我要回復正常生活時,就發覺全身都好痛,肌肉痛到不得了,原來嗰幾日都好蹦緊,身體話我知,嗰一刻我要令自己去抗衡(情緒)同處理佢嘅身後事,需要好大勇敢面對,甚至當父母及朋友問我O唔OK,我都擠出笑容扮無嘢,所以當放鬆之後,發覺原來我係身心都透支咗。」 細佬佬係佢嘅支撐點,為咗佢,小儀努力走出傷痛。

「因為細佬,我努力走出呢個低谷。佢其實同我哋一樣都要面對,佢都知道哥哥走咗,或覺得嗰個空間少咗一隻嘢,明明由細到大都同哥哥一齊,而且哥哥好鍚佢。

有獸醫教過,若擔心小狗獨處時出現不安,就開收音機,等個空間仲有啲聲音,而唔係突然靜晒。嗰個禮拜我都開咗收音機俾佢,估唔到佢比我更快適應。

我喺Dee Dee身上都學咗好多嘢,而家喺細佬佬身上都學咗好多嘢,

例如學識面對、活在當下,緬懷過去係可以,但唔可以沉溺喺當時嘅傷痛或者快樂,係要繼續向前行。」 曾經有朋友怕小儀睹物思犬,勸佢對Dee Dee遺物要斷捨離。

「軒仔送咗兩個喺英國手造純銀鏈墜俾我,佢話係之前造多咗,叫我喺喪禮上,搵工作人員幫手剪低Dee Dee少少毛,然後將啲毛放入鏈墜作為紀念。又好彩之前好無聊咁整咗個Dee Dee咕𠱸。依家呢啲咕𠱸,Dee Dee鎖匙扣嘅物品,統統都放喺屋企,感覺上佢好似無離開過。當然有啲人叫我放手,覺得我唔應該再放佢嘅物品,不過我覺得唔需要,呢個係好嘅回憶。正如你同一個人分手,都唔應該掉晒啲情信同禮物,因為呢啲都係歷史,係你同佢之間嘅歷史,我覺得好與唔好都應該要保存,唔係要勾自己乜嘢傷感情緒,而係一種紀念。」小儀攬攬身旁的細佬佬,終於有番笑容。

採訪:Sukey Lo

攝錄:黃志明

場地鳴謝:Whiskers N Paws -----------------------------

【2019 區議會專題】

最齊全區議會入閘名單 互動民調

11.24 用選票重奪區議會

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情地址


鍾意就快D Share啦!