一個平靜的閒日，沒有抗爭活動的維園，沒有防暴警硬闖，沒有催淚彈，袁彌明父女走過足球場，在公園的木凳坐下，享受公園的鳥語花香，袁爸爸袁弓夷感慨地說：「一切由呢度開始，（遊行集會時）呢度就係戰場，但你今日睇睇，幾太平，有人一家嚟行吓，亦有老人家喺度享受緊寧靜，𠵱家係天堂，當時係戰場。」
| | |
建議立紀念碑
Erica則說：「維園應該係咁，每個社會都有訴求，有遊行集會好正常，你睇六四集會，到反送中遊行有200萬人行出嚟，差唔多過三分一人都出咗嚟，證明香港𠵱家唔係一個安寧嘅社會，維園都係一個指標。今次傷亡人數太多，最嚴重，以前咁多次遊行都仍覺得香港仲係一個和平、安寧嘅地方，但最近連維園都射催淚彈，裏邊啲人完全冇防避，𠵱家全港都係催淚彈，催淚彈係唔會分解，只會到處分散。」袁爸爸認為應該在維園建立一個烈士紀念碑：「六四又好，今次都死咗好多人，遲啲冇人記得佢哋，有個碑更加好。」
政府「以暴製亂」，巿民決要反抗，Erica見證社運持續逾五個月，她無奈說：「本來好有希望……不過，已經起碼喚醒咗幾代人，知道我哋喺乜嘢情況，一定要反抗，但代價實在太大，好多年輕人又要俾人拉，受傷甚至（死亡）……香港人好犀利，周一到周五朝早着西裝返工，周六周日就變身，好似Superman，咁樣冇得唞，日日都打仗，但冇辦法，我哋要守住自己價值，必須要咁。」
上周各區遍地開花，警方以催淚彈放題清場，還開槍射學生，甚至衝擊多間大學校園，令人心傷，袁爸爸很欣賞前線的勇武派：「我覺得啲後生仔好偉大，好了不起，當日發生辛亥革命、六四，個個都話啲後生仔做得啱，𠵱家變咗，內地媒體話佢哋唔啱，國際媒體同內地媒體說法唔同，不過時間耐咗，會有好多新聞滲透入內地，全世界都會支持，講老實話，政權係唔講道理，所以唯一要靠美國唔畀佢使用武力，先有機會成功，如果冇美國力量，佢遲早都要鎮壓。」
權力蒙蔽良知
銀髮族的袁爸爸明白事理，體諒年輕人：「我同普通後生仔諗法一樣，唔係我明白佢哋，係其他人唔明，我覺得奇怪，點解咁簡單都唔明白。好多人為權力同金錢，蒙蔽咗良知，仲變咗直覺，覺得對佢哋權同利都有好處，就走咗去嗰方面。」袁爸爸到位的論點，連女兒Erica都認同他是一位「衝衝爸」：「佢係由世界角度出發。」
有「衝衝子」不被家人諒解，甚至被父母經濟封鎖，袁爸爸嘆道：「冇辦法，佢哋父母嘅想法改唔到，惟有等佢哋呢一代過，下一代上嚟，好多人一世唔思考，實際呢班父母就係『反動分子』。」Erica也體諒抗爭者：「好難諗𠵱家後生一輩去抗爭，父母不但唔支持，仲要經濟封鎖佢哋，成個家觀念唔同晒。呢啲父母唔好做人父母喇，父母口講想細路健康開心，實際要畀子女一個安全網，呢啲係小朋友最基本，要佢哋返屋企有飯食，有基本經濟支持。父母話生佢出嚟想佢快樂追尋夢想，冇晒喇，子女去追夢，父母就唔畀佢返屋企。」
內地只有強權
兩父女都理性分析討論，袁爸爸說：「冇得拗，道理就擺喺枱。」Erica也說：「真相同事實喺同一平面，拗乜箒！我哋唔係感性出發，我哋乜都用理智邏輯解釋，全部好科學、好數據。」袁爸爸尊重子女思想自由：「細路唔係父母財產，細路大咗會變朋友，你尊重我，我尊重你，你愛護我，我愛護你，大家開心咪夠。」Erica說：「你唔會控制或逼你嘅朋友 。」
袁爸爸指東方人價值觀與全世界脫節：「好彩我哋受過殖民地統治，內地一直未見過自由，又未試過法治，佢哋嘅『法治』係邊個惡啲，即係你同個未飲過咖啡嘅人講，講一百次都係冇用。內地冇普世價值，只有強權嗰套。」
袁爸爸數出中國五四運動時很開明，但一行共產主義便大倒退；若然抗爭持續膠着，香港沒將來，袁爸爸會考慮移民：「再咁都住唔落去，實玩完。」Erica則說：「我會留守到最後一秒。」
髮型：Nelson@Hair
場地提供：Eat Darling Eat
|
鍾意就快D Share啦！
|
|
|