2019年12月6日星期五

【頭條獨家】宇宙最強「收山」唔拍功夫片甄子丹行超巿樂做老婆阿四 __,甄子丹,

【頭條獨家】宇宙最強「收山」唔拍功夫片甄子丹行超巿樂做老婆阿四

負責攞嘢丹爺等太太畀完錢，佢就負責做阿四攞嘢。

「宇宙最強」甄子丹除咗打得，仲出晒名錫老婆汪詩詩，二人結婚16年依然恩愛，皆因丹爺講過乜都畀晒老婆，絕對係百分百嘅「愛妻號」。雖然佢拍親戲啲片酬都億億聲，但56歲的丹爺上周三（11月27日）宣布拍埋《葉問4》就「收山」唔再拍功夫片，似乎想留多啲時間陪老婆仔女。日前Free番好多嘅丹爺，一身街坊look陪素顏太太詩詩到中環行超市。見他跟住老婆去揀好多食品，兩人又商量買咩調味料，短短半個鐘手推車兩個籃Full晒。之後負責查數嘅詩詩畀完錢，丹爺就醒目地用手推車將三大袋食品推落樓下攞上座駕，全程親力親為，搞掂晒再拖住愛妻到四季酒店撐枱腳。見詩詩食飯時笑得好甜，就知呢個「阿四」有幾成功採訪：張詠森

丹爺為咗頭家多年來搏到盡拍戲，最威水係飾演「葉問」呢個角色，10年前拍完第一集勁受歡迎，到10年後拍到《葉問4》居然仲有捧場客，難怪丹爺都話要多謝大家咁多年嘅支持。不過他覺得見好就要收，上周三（11月27日）為本月上映的《葉問4》出席宣傳活動時，他坦言今集唔單只係《葉問》系列嘅最後一集，亦都係佢最後一套功夫片，他解釋：「拍咗咁多電影，功夫片差唔多喇，《葉問4：完結篇》作為我嘅最後功夫片，希望可以寫下寶貴嘅一頁。」其實有咁嘅決定，唔多唔少都係為咗老婆同仔女，因詩詩曾嘆老公拍戲唔定時，連假期都冇得預，通常要到last minute先知道，加上丹爺都56歲，係時間要享受人生，留多啲時間陪屋企人。

店員讚Fit

日前就見丹爺一身街坊look陪住太太詩詩偕家傭姐姐到中環ifc的Citysuper掃貨，只見他們一入內先揀蔬菜生果，然後再去買凍肉和奶品等。跟住又去買麵和買米，佢哋買得最開心應該係調味料，因為佢哋會互相畀意見，看來兩公婆都鍾意玩吓煮飯仔。後尾他們分開再睇下有冇漏網之魚，只見丹爺好鍾意食Nuts，見到有得試食，佢都唔執輸，仲食到津津有味，試完後就買咗兩包，絕對係上等人，最後仲買了支酒。雖然丹爺戴帽又戴黑超極低調，但點會冇人認得「宇宙最強」呢？其間有些店員姐姐大讚：「佢真人都幾Fit喎！」

老婆滿意

買咗大約半個鐘，一架手推車兩個籃載到滿滿的，跟住佢Join番老婆去排隊畀錢。只見詩詩負責找數，丹爺就同工人姐姐將食品放入環保袋，足足放滿三大個咁多。之後丹爺用手推車載住三大袋食品推落樓下攞上座駕，全程親力親為，十分貼地，難得丹爺唔介意做阿四，而詩詩就舒舒服服在旁等候。丹爺搞掂晒就輕輕鬆鬆拖住老婆去隔離嘅四季酒店食Lunch，見詩詩坐低後笑得好甜，似乎好滿意老公嘅表現，超開心！