現年34歲的張文采上月25日最後一次現身無綫新聞，在新聞報道結束前，她向觀眾作最後道別：「呢節新聞報道完喇，多謝大家十年嚟嘅支持，後會有期，再見。」正式結束與無綫的十年賓主關係。回復自由身的張文采，日前在觀塘接受《蘋果》訪問，眼前的她像變了另一個人，除了一臉輕鬆的笑容，髮型、化妝及衣着打扮都跟新聞報道內的「張文采」很不同。張文采笑謂：「有同事問我離職後第一件事係咪去生仔，我就話係去染頭髮，因為一直好恨染一個灰色頭，所以即刻去染。」
最後出鏡緊張手震
重提當晚最後一次報新聞，張文采說：「之前同事問我有冇緊張我都話冇，但原來坐低咗真係有啲緊張，我本來冇諗住要講啲乜，但同事就話最後一次，一定要講啲嘢，於是我就叫編輯畀五秒時間我，緊張程度比第一日返工仲大，手心冒汗，好唔想讀錯同食螺絲，真係手都震，想喊咁滯，讀完之後望出去見到好多同事伏晒喺玻璃望住我，大家拍晒手掌，出到去就忍唔住喊喇！」
無綫新聞部過去半年屢被批報道偏頗，內部亦爆發離職潮，有傳一周內有八個記者、主播辭職。一直未有公開表態的張文采，承認不少認識的人，知道她辭職後都曾經問她同樣一個問題，就是「點睇無綫被指報道偏頗？」而她的答案都是一樣：「做得份工就要專業，接受唔到，咪走囉！」不過，張文采強調離職並非單一原因，又指去年已經許下承諾，做滿十年便離開，因為覺得十年是一個里程碑，她笑言：「公司為咗慰勞年資長嘅同事，有餐飯同有個金牌，我一直朝住呢個目標進發，終於都食咗餐飯喇！」
仍然關注社會現況
工作量越來越多也是張文采請辭的重要因素。她說：「工作量好多，好長工時，同以前個年代好唔同，自己年紀又越嚟越大，唔係好應付到，有時返凌晨4點，有時收凌晨12點，好多重要直播要做，準備工夫要做好多，咁結咗婚都想穩定啲，加上老公嘅工作，每星期會有一、兩日唔喺屋企，之前真係試過一星期只見到兩次。」
香港社會氣氛於過去半年一天比一天差，張文采坦言對心情都有影響：「有時睇得多，每日讀咁多，係睇到個心好唔舒服，唔想咁前線接觸呢樣嘢，當然個心都會諗住，加上𠵱家一打開電話都會睇到好多……係要繼續關心嘅，但要搵方法去抒發。」她補充：「我覺得作為一位專業主播，無論乜嘢情況，就算屋企或者身邊有乜嘢事，觀眾開住電視就係望住你，就要表現專業一面，私人感情一定要擺埋一面，可能你啱啱同男朋友鬧完交，或者啱啱喊完，你坐上去都要表現專業，先係尊重番自己工作，因為唔係只代表自己，係代表公司，而且可能一個失誤會影響到其他同事，有乜嘢就off camera先處理。」
撰文：鄉奈仁
攝影：陳俊強
化妝、髮型：MM TANG Makeup
場地提供：廿一由八
|
鍾意就快D Share啦！
|
|
|
