曼聯剛於「雙紅會」吞利物浦2蛋，球隊表現認真麻麻，好彩場外總算衰唔晒，後備門將羅美路，雖然發生交通意外、其價值17萬鎊（約172萬港元）嘅白色林寶堅尼撞到車頭、車尾爛晒，但佢吉人天相冇穿冇爛，被當地記者影到佢於意外後，企喺出事地點打電話報警，真係還得神落。
據英國《每日郵報》報道，即將33歲嘅羅美路於接近曼聯卡靈頓訓練場地附近出事，從圖片睇到，佢架超級跑車撞咗入高速公路圍欄，車頭損毀車頭蓋打開，車尾部份亦撞到爛晒，相信意外都唔係唔嚴重，可幸嘅係佢本人冇受傷，都可算係奇迹。曼聯官方已確認羅美路發生交通意外，聲明中亦話佢絲毫無損。
2015年加盟曼聯嘅羅美路，雖然今季未於英超上陣，但佢曾於歐霸盃4次出場，並於英聯盃3次把守大門，而佢亦於剛啱淘汰狼隊嘅英足盃中上陣。2017年佢於歐霸盃演出神勇，決賽對阿積士正選上陣，力保不失協助曼聯2:0捧盃。
來源 source: http://hk.on.cc
|
鍾意就快D Share啦！
|
|
|
