武漢肺炎疫情肆虐下，市民減少外出，餐飲業首當其衝，吳啟明在上環開設的餐廳「慢煮兩餐」在疫情下生意大跌七成。為了救亡，他曾嘗試聯絡業主商討減租，但業主連一句回覆都沒有，吳啟明惟有為自己的餐廳存亡劃下「死線」，他說：「睇埋3月先，除非業主企硬話唔減，就會逼我走。」
吳啟明前年在上環開設餐廳「慢煮兩餐」近日受疫情影響生意大跌，日前他接受《蘋果》訪問，當日下午約1時，可以容納約28位的店中坐滿八成客，生意看來不錯。不過，吳啟明卻說：「之前我哋午巿係一條長龍排到街尾，全店坐滿客人，仲會做到三轉，相比𠵱家得八成客，係少咗七成生意。」
吳啟明指農曆新年假後，見晚上沒客人幫襯，已索性暫停晚巿，他說：「員工全晚呆企4個鐘佢哋都悶，不如返去唞吓，又可以慳返燈油火蠟。」疫情一度令巿面出現搶米，吳啟明說：「食材我哋一向有存量，不過我哋啲飯係用唔同地方三種米混合煮，其中東北米冇晒貨，我𠵱家試緊另一款米代替，都少少頭痕㗎！」
為保員工唔斬纜
店中樓面連廚房共有四名員工，縮短半天工作，薪金是否要減半？吳啟明坦言：「我一直唔想剝削員工薪金。」他寧願自己諗計「計掂條數」，他說：「我算好彩，中環夜晚生意向來唔係特別好，我最初開店都主打做午巿。」幸好吳啟明對食物質素有要求，獲大機構向他每日訂餐，「嗰間大機構以前一直幫襯快餐店，之後發現我哋嘅食物質素高啲，嚟試餐後就轉向我哋訂餐，全盛時期一日訂到最多500份，我就搞埋工場出餐，雖然近來訂餐數量少咗，但最差都有50份。」以每份餐60元計，每日定額有50份，做足30日未計堂食月收9萬元，但餐廳月租要8萬元，加上店員薪金，收支「掹掹緊」。吳啟明表示有想過變陣，「午巿受影響，生意額cover唔到舖租，喺生意角度，係要cut咗蝕錢部份，盡快斬纜。」曾想過把員工全調到工場開工，然後把餐廳摺埋，但他說：「最終呢步唔諗住，唔想員工忽然冇嘢做，有啲啲人情味就唔想斬住。」
嘗試過聯絡業主商討減租，不過吳啟明說：「呢幾日係咁搵業主都搵唔到，我留咗言，叫佢回覆都冇覆。」問到他想減租多少？他說：「想減幾多唔係我決定，大家近日都睇到報道，各大商場向租戶減一半租，又話2月份唔收租，我都係朝住呢啲方向。其實去年6月開始社會運動，我過去半年都頂住咗，到去年底近11月時，業主先話每月減我5,000元，𠵱家咁嘅時勢，仲停留兩年半前租金，真係好唔公平。」吳啟明會給自己和業主限期嗎？他續說：「睇埋3月先，除非業主企硬話千祈咪再減，佢只係減5,000元係會逼我走。」
全店消毒吸客源
吳啟明指為讓客人食得安心，每日開店前都會清潔消毒全店，「自從開店以嚟，侍應送餐一直都戴手套，𠵱家要戴埋口罩。」侍應更會為客人遞上紙巾，方便存放口罩，各式套餐已大部份換上即棄餐具，吳啟明說：「疫情前都轉用咗㗎喇，主要唔想加重洗碗員工嘅工作量。」
採訪：比華利
攝影：陳慧安
來源 source: http://hk.entertainment.appledaily.com
|
鍾意就快D Share啦！
|
|
|
