2020年2月27日星期四

【頭條獨家】零外快　6位數化煙　姚亦澧逆市開餐廳搲銀

受疫情影響，姚亦澧大嘆工作量暴跌，幸私下他仍有投資飲食及房地產工作，幫補家計。

新冠肺炎肆虐，導致百業蕭條，不少藝人都大呻收入驟減，無線藝人姚亦澧（前名姚浩政）也不例外，雖然近日仍要開工拍攝新劇《踩過界II》，但一向接不少司儀Job搵真銀的他，亦不禁嘆工作量暴跌，短短兩個月已有3、4單Job被取消，損失達6位數，幸私下他仍有投資飲食及房地產工作，幫補家計。姚亦澧苦呻：「呢兩個月真係停晒工！但做咗10幾年都明白遊戲玩法，有戲咪拍，冇戲咪做番自己嘢囉，好多藝人都搞生意，喺演藝事業以外都可以有我一片天㗎。」採訪：黎寶倫

姚亦澧話香港演藝事業都轉緊型，這個是大趨勢，冇得逆轉，「但我唔會放棄演藝事業，因為生意同幕前係可以並行！」面對幕前收入急降，好在私下除了為馬來西亞地產發展商代言及開拓市場外，他本身亦有經營曼谷流水蝦燒烤放題「泰.夯蝦」，雖然餐飲業陷入冰河時期，但早前他仍跟拍擋於逆市中，斥資7位數在尖沙咀開第二間分店，「我哋野心都幾大，希望建立自己嘅飲食王國，咁啱呢個舖位出租，所以就把握機會，決心跳出市區囉！（唔擔心疫情影響生意？）啲人都係要食嘢，餐廳都係要開㗎啦，生意總有Up and down嘅，我哋唔想畀環境因素影響，所以搏一鋪照去馬！」

3大防疫措施

至今開業近1個月，新店幾乎晚晚爆場，姚亦澧開心笑道：「托賴生意都唔錯，因為第一間口碑唔錯，好多人都慕名而來，Booking已經排到3月。（收入幫補到幕前損失？）當然可以」對於早前爆出「邊爐家族」事故，不少市民對氣霧傳播感憂慮，他稱現時採取了3大防疫措施來增加食客信心：第一，每位食客需量體溫及全身高溫消毒；第二，店內加強消毒清潔，確保環境衛生；第三，他們特意花費近20萬添置大型抽風系統，使室內空氣流通。