2020年4月28日星期二

【頭條獨家】移居蘇格蘭同老婆日日散步喬寶寶「登五」冷清慶祝 #喬寶寶

【頭條獨家】移居蘇格蘭同老婆日日散步喬寶寶「登五」冷清慶祝

寶寶「登五」冷清慶祝，喺當地他每日會同喬嫂嫂圍住湖邊散吓步。

已移居蘇格蘭、與家人團聚嘅喬寶寶，本月23日踏入50歲，因為當地新冠肺炎疫情仍然嚴峻，所以尚未解除外出限制，喬寶寶只可留在家裏慶生，寶寶笑說：「50歲生日過得好特別，阿媽話由我出世開始，未試過少於6個人同我慶生，今次得5個人。」採訪：方騫平

返咗蘇格蘭個幾月，寶寶表示生活得幾好，一切都很順利！但因為疫情關係，喺防疫措施下，除咗出街購買基本日用品及做運動等，一律唔可以離開住所，長留在家嘅寶寶都有啲悶：「喺香港做嘢做咗咁多年，而家陪返屋企人都OK嘅，所以成日喺花園陪細仔玩吓，每日食完飯同喬嫂嫂喺湖邊兜個圈，都行成一個鐘㗎，仲會輪流去放吓狗、幫自己同埋細仔剪頭髮，23年前我幫過大仔剪，嗰次佢嬲咗我一星期，反而細仔讚我手勢好，仲畀手指公我。而到咗周六及周日係家庭日，之前就喺花園燒烤同我慶生，老婆負責煮、大仔買爐，我就負責食。」

退休生活等抱孫

寶寶生日當天，分別和加拿大、香港、英國及印度等地朋友以視像慶祝：「契姐黑妹姐話香港有嘢做一定預埋我，叫我耐心等候。」提到生日願望，他即說：「脫離苦海，離開疫情，過返啲正常生活。𠵱家大仔、新抱都搵到份好工，我自由自在，只係等抱孫，阿仔話等疫情過咗先計劃生B，始終新抱係醫師，日日出入醫院，而且佢哋唔興戴口罩。」跟新抱同一屋簷下，寶寶話危險都冇辦法，自言命裏有時終須有！