2016年，一個劉嘉玲嘅圍訪，TVB將ViuTV咪牌打格之後先播出街，事後被觀眾恥笑小氣。最近，ViuTV音樂節目CHILL CLUB嘅歌曲推介榜，連續數星期將TVB劇集《飛虎之雷霆極戰》嘅主題曲《呼吸有害》上榜，最新一期仲上埋榜首。拍埋比一比，高下立見。
真心推介歌曲又好，為彰顯公信力都好，ViuTV呢步真係相當漂亮，連主唱莫文蔚都特登拍條片多謝ViuTV，話：「希望可能喺嚟緊日子，返到香港同大家見面，兼喺現場同大家唱呢隻歌。」主唱話要上ViuTV唱TVB劇集主題曲，夠晒諷刺，而且叫TVB顏面何存？
無計，自己唔爭氣，連1981年至今嘅《勁歌金曲》，大大個品牌都被斷送，無晒公信力，而且期期嘉賓幾乎同一班人、全部自己友：胡鴻鈞、菊梓喬、鄭俊弘、吳若希、譚嘉儀……
早幾年開始嘅《流行經典50年》，多得薛家燕同黎小田，一度有聲有色大受歡迎，但最近亦明顯走下波，就嚟變成「勁歌2.0」，愈來愈多自己友身影，以最近幾集為例：黃智賢、李璧琦、吳幸美、黎耀祥、楊卓娜、鄭俊弘、周志文、周志康……其實都總有啲資深歌手支撐場面嘅，但咁嘅時勢，聽一個有日本永住權嘅陳美齡唱《香港香港》：「這裡有許多好處沒法講，說一聲香港、香港，你永遠是尋夢鄉；香港、香港，你那色調難忘。」叫觀眾作何感想？
都係轉台，等睇許志安「安心偷食」後復工唱《一步一生》：「沿途就算跌，要跌得好看……願我能提示我這一雙腳別震。」更加過癮。
----------------------------
壹呼百應 號召有心人 請香港人睇壹週刊
按此了解更多
----------------------------
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
