2020年6月16日星期二

Mirror新歌MV玩360度拍攝 Ian 27歲牛一望人人有工開

Mirror本來計劃在2020年舉行個唱，但由於疫情關係，演唱會需要兩度延期。有關演唱會延期事宜，將於落實後向外公布。

男子組合Mirror相隔七個月終推出2020年首支派台歌《IGNITED》，早前12位成員拍MV期間順道替當日27歲牛一的Ian慶祝生日。壽星仔生日願望除咗世界和平就係希望人人有工開。

新歌《IGNITED》的曲風有別之前的《ASAP》或《Reflection》，編曲走Funky路線，聽吓隊長Lokman點介紹：「就好似歌名一樣，《IGNITED》畀人好熱辣辣嘅感覺，曲風同以前好唔同，因為都想有啲新花款，畀唔同感覺大家。」經理人花姐今次再重操故業，繼Jer《水刑物語》後，再為Mirror擔任MV導演，而拍攝上亦為組合帶來全新概念，以360度拍攝。而拍攝當日亦發生小意外，Stanley說：「我哋首次採用360舞台拍攝，好有型嘅，而我又好彩係第一個拍，但好不幸我好有型望住個鏡頭一眼，個Cam嘅轉台就壞咗，之後攝影師要人手Keep住轉個Cam先可以繼續拍攝落去。」

新歌除Funky版外，亦有一個Remix版，拍攝MV當日，Mirror亦需要拍攝跳舞版，Edan坦言是體能上的大挑戰，他說：「Funky版趣味啲，對於姜濤、Anson Lo佢哋型開嘅就困難啲，哈！Remix版感覺K-pop啲，我哋亦有拍一個Dance Version，要一鏡過。上次拍《Reflection》跳咗廿幾卅次，真係崩潰咁滯，希望今次可以快手啲。」眾隊員亦不負所望，最終連拍6 take，花姐便收貨。其實拍攝MV當日，剛好是Ian的27歲生日，工作人員早已偷偷為他準備生日蛋糕，在拍攝中途更與Mirror各人突襲送上驚喜，Ian發現後展露天然呆表情。問到生日願望，Ian表示：「最緊要世界和平，喺疫情之下亦希望人人有工開，不過就早啲收工」