現年38歲的前香港先生吳雲甫（Owen）去年11月被發現，與拍拖僅四個月的瑜伽教練林瑋如（Jackie）入紙註冊結婚，並於今年3月1日拉埋天窗，Owen和老婆好快宣佈有喜，Jackie的預產期是今年11月。但受疫情影響，Owen任職的健身室倒閉，被拖欠10萬元薪金，為養家要拍住大肚老婆一齊轉做KOL，拍片上網教人做運動。
Owen日前趁天朗氣清，陪老婆去沙灘曬太陽兼散步。當日下午約3時，二人相約一男一女友人去淺水灣食下午茶，Owen穿上一件粉紅色背心騷麒麟臂，加上草帽，十分搶眼。四人選擇坐餐廳門口的開揚位置，Owen和老婆正好面向大街，見Jackie與友人傾得好投契，全程未停過口，反而Owen有點不專心，不時玩手機及望街。雖然老婆在身邊，但Owen仿似有一對「雷達眼」，每次有Hot Girl經過，他都會不經意上下打量一番，短短幾分鐘，已獵獲4位穿着吊帶裙或小背心的靚女，盡收眼簾。
逗留約1小時，友人負責先付款簽單，之後四人便一齊落沙灘行了約10分鐘，其間Owen好細心照顧住老婆，全程拖實Jackie的手，十分浪漫，之後便駕車離開。
吳雲甫曾加入加拿大陸軍，2006年於約克大學以視覺藝術系榮譽生份分畢業，之後於喬治布朗學院（George Brown College）修讀平面設計。2009年返港參加香港先生，但卻花邊新聞多多，傳他已婚，又被指有易服癖，及有眾女摸身的豪情照流出，Owen解釋只是工作相及生活相，並否認已婚，結果他大熱倒灶，最後由許家傑贏得冠軍。Owen加入無綫後做過娛樂新聞台外景記者，又拍過不少劇集，但多屬閒角。反而離巢後，以自由身回歸無綫拍攝《荷里活有個大老千》飾演正直警察大勇，跟劉溫馨有感情線，可惜慘死收場，但演技獲不少網民讚賞。
----------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
