武漢肺炎疫情第三波爆發，食肆生意繼續首當其衝，加上全日禁堂食令又彈出彈入，真係俾佢考起。
香港唔少圈中人都開餐廳做老闆，例如唐文龍有間日本餐廳「昭和食堂」、李家鼎早前仲冒疫市風險喺山頂開多間「燒鵝湯館」添。佢哋都嘆生意難做，撐得幾耐得幾耐。
唐文龍居酒屋唔做外賣
唐文龍有份投資開設嘅居酒屋「昭和食堂」，只要經過，好自然會被門口嘅巨型油畫吸引，入到店內感受下復古風裝潢，就知佢行高檔路線「食氣氛」。再加上主打日本食材、串燒、時令刺身，齋諗都知皮費唔嘢少！唐文龍都直言呢段時間撐得辛苦：「我哋昭和食堂仲喺度，仲健存，但撑得辛苦。至於我哋有無蝕錢呢？有！但我哋之前幾年都有賺嘅，咁我哋都撐得住嘅。我哋股東好一段時間無將賺到嘅錢分出嚟，為對抗過去呢十二個月嘅各種經濟考慮，我哋就用呢啲錢去努力、去經營落去。」一個好嘅「包租婆」都幫到好多忙，唐文龍話：「因為香港政治風波減咗租，好似係上年年底。咁跟住疫情呢段時間又減咗一次，呢次係哋去問佢，佢肯再減。而家我哋都可能要再同個房東傾，佢就好好人嘅。唉，但係……希望佢再畀我哋減一減租啦。」
為咗撑落去，好多食肆都致力做外賣，但唐文龍表示「昭和食堂」唔做外賣。一來，餐廳主打串燒、刺身，外賣會影響食物質素。第二，考慮到員工以及食客安全。「做外賣嘅吞吐量未必咁理想，好多人都未必敢去買外賣，可能佢哋都會驚外賣(包裝)消毒方面係咪到位呢？個個消費者都會有佢嘅擔憂。而且整體考慮都係安全，以呢個態度去保護員工，以及控制傳播嘅可能性，所以我哋應該唔會做外賣。」唐文龍說。
李家鼎疫市開分店
唐文龍為員工安全唔做外賣，李家鼎亦為員工生計疫市開分店。李家鼎、李泳豪兩父子喺本月23號剪綵開張，唔係因為生意好，而係一早計劃一月開張，可惜受疫情關係已經三度延期，仲令好多捧場客去到門口先知未開張搞到摸門釘。為畀食客一個交代，兩父子硬住頭皮開張。同其他食肆一樣，「禁堂食」朝令夕改真係無所適從，但兩日後恢復早、午堂食限每枱兩個人，好聽啲講叫做有返少少希望，好過無啦，始終身後仲有一班伙記要「食飯」嘛。「如果唔開(做生意)，我講一句好簡單啫，但同我哋打江山嘅伙記就好陰公囉。唔可以刻薄班伙記，我冇減佢哋人工，佢哋好開心。」鼎爺說。
----------------------------
無懼白色恐怖 黎智英劉細良開講抗港版国安法
立即收看ChannelNEXT《人民學堂》
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|