梁芷珊曾集作家、企業家、填詞人身份於一身，她於2002年與富商羅傑承結婚，二人一直是圈中公認的模範夫婦，婚姻維持了15年，在2017年低調辦妥離婚手續。芷珊表示離婚報道出街後有不少評語，正所謂「識睇睇留言」，她看到當中有人批評「幾廿歲人，都仲要愛情，知唔知醜」，覺得是未打先輸，拒絕了「愛情」。52歲的芷珊依然相信愛情，近年轉戰飲食業，跟外籍廚師拍過又離過，現在再見仍是拍檔。
愛情路上，芷珊雖然初中就拍拖，但未算「好好打」，不過憑獨有的觸覺及懂得聆聽，令其所寫的愛情小說當年大行其道，《四葉草》系列更道盡那些年年輕人的愛情故事。睽違16年再投入創作，不同的是由繁轉簡，網上發佈電子化。芷珊早前為「tbc...經濟體」網上閱讀平台宣傳接受訪問，認為媒體變化是必然，電子化的好處是讀者免卻運輸、印刷的使費，她說︰「人生階段有空閒，可以再去寫嘢嘅時候就去寫。facebook較合適文字，YouTube適宜講說話。今次特別嘅地方係會有愛情信箱，係一種歸位，好想做呢樣嘢，呢個位係等緊我返嚟填補，以前有南宮夫人。」
她說以往寫愛情小說時，都有讀者以私訊形式詢問意見，而她每次都會回答。最深刻一次是有位少女在愛情上受折磨，之後去到暴力，更出人意表的是施暴的主人翁正是芷珊的男性友人︰「嗰一刻好震撼，畀咗相我睇。問點做，我叫佢離開對方，不過嗰位少女用咗好多理由，都要留喺個男仔身邊，我亦冇同呢位男仔朋友講起件事。」每個人都有自己故事，找感覺上有聯繫的人去傾訴，是一種隔空信任，跟身邊人反而未必會講起，因為擔心影響身邊人。信箱可以提供支持，溫暖大家心靈，幫助迷途小羔羊︰「我好鍾意研究呢方面，亦都睇好多愛情心理學嘅書，我嘅人生經歷，大家都好清楚，感覺都親切啲。」芷珊亦慶幸18歲囡囡拍拖，都有跟自己分享。
女校出身，初戀發生在初中時，對象是男校運動健將兼學界田徑紀錄保持者。芷珊每日都會算準時間，自製在巴士上「偶遇」，她笑說︰「我發覺都幾鍾意一啲叻嘅人，有一啲嘢佢係叻過我，而我完全唔識嘅，咁就吸引到我。」芷珊當時家住華富邨，在天后上學，每日都要計準時間，坐駛經香港仔的41號巴士回家︰「要唔好遲一班、唔好早一班，啱啱好兜到佢放學。個男仔讀香港仔工業學校，懶係製造『地下鐵碰着她』，其實係巴士上層碰着他，我哋華富邨都係住同一幢樓。」經過多次檸檬茶廣告「乜咁啱嘅」的開場白，二人自然走在一起，芷珊回想這段puppy love嘴角泛起一絲甜笑。純真的年代，拍拖就是一齊落車後到超市逛逛，拖吓手仔已經是極甜蜜的回憶。這段情維持到中學畢業，直到有一年芷珊發現了一件事，導致二人疏離，戀情亦無疾而終︰「有一年暑假之後發現高過佢，同埋佢又試過停學去做嘢，時間唔啱就冇一齊。」
講到跟羅傑承的婚姻抉擇時，芷珊不慍不火的道︰「分開時大家都好成熟，會諗一齊開心啲、暢順啲定負擔多啲，大家都諗到個畫面，分開嘅決定，係嗰期大家最合拍。」她希望帶出「再見亦是朋友」的訊息，回想跟前夫的關係，可以說是無憾。相遇時都係對方最合適的人，在不同事業階段都發揮到作用︰「羅生大我9年，係恰當照顧我嘅人。」分開時低調，到離婚消息公開，有不少好事之徒留言，令芷珊在意的是有人話自己不怕醜，幾十歲人還要愛情︰「愛情同年紀無關，講呢番說話嘅人都幾慘，不過呢幾句嘢都幾多人係咁講。有呢種想法嘅人，首先佢係拒絕咗愛情。」
芷珊透露網上閱讀平台已經運作，她負責《她來自江湖》專欄，之後會重寫經典愛情小說《咖啡樹》2020年版；同時主持《愛情江湖信箱》，無論讀者正處於相戀、失戀、明戀、暗戀、苦戀、畸戀或生無可戀，她都會為其拆解。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|