六月底，高登女神樂瞳疫市創業賣洋酒，將積蓄押上創業作，為了提高吸引力，索性將卡片掟上網，講明親自接單覆客，成最大賣點。一個月後，樂瞳接受本刊訪問時興奮地說：「剛開店一個月，暫時反應都唔錯，有客人亦已回頭幫襯幾次，所以我覺得係好大嘅鼓舞。」樂瞳表示，記得當初決定網上賣洋酒時，只憑一個「勇」字，她說：「最初其實有少少擔心，逆市創業都幾冒險，本身都係孤注一擲，花咗好多積蓄出嚟去做呢門生意。」本身對洋酒的了解並不深，為了專業一點，樂瞳花了很多時候去鑽研，「一直以嚟對葡萄酒都好有興趣，幾年前開始已經有報讀少少相關課程，自己去旅行時亦好鍾意參觀一啲酒莊。舊年去咗一轉歐洲，去完波爾多後感覺更加濃厚，好想快啲開始做一啲同葡萄酒有關嘅事情。」旅行後，樂瞳開始籌備網上賣洋酒一事，因為疫情關係拖慢了進度，所以六月才正式開始。
想開實體店
疫市創業，殺出條血路，下一步，樂瞳最想開實體店，「最近嘅目標，係希望盡快有自己嘅實體店，有朋友話而家租金回落，其實應該試吓。但我就唔敢冒險，喺呢段時間咁快去做呢件事，始終都係初哥，仲有好多嘢要學，覺得呢段時間應該睇定啲，因為呢啲真係心機血汗錢，唔可以亂花。」多年來，不少人透過樂瞳的社交平台，看到她經常旅行、食好西、買名牌包包等，總是覺得她活得很離地，這一刻，樂瞳想為自己抱不平，「外界經常誤解我，自己都好唔開心。大家喺幕前見少咗我，就以為我好似無工作，但其實我有做好多不同的工作，但唔知點解，總係被標籤成某一類人，我覺得對自己真係好唔公平。自己花咗好多努力去做呢門生意，好唔希望被誤會成經常只顧吃喝玩樂嘅一個人。我真係有為咗呢份工作慢慢去學習同付出。」喜歡享受生活
樂瞳不想被外界標籤為某一類人，她說：「早幾年努力工作，慢慢儲到一筆錢，全部係花自己嘅錢，請屋企人去旅行、俾家用、買手袋，全部都係用自己錢，唔明白點解經常被人誤會。我真係儲咗幾年錢，先會去歐洲買包包，因為當地比較平。我覺得如果搵到少少錢，獎勵一下自己都好正常。」樂瞳認為每個人都有不同的價值觀，她只不過是喜歡享受生活，不是生活奢華。不急著找男友
剛踏入34歲生日的樂瞳，希望生意愈做愈好，自言單身的她，並不急於搵男朋友，「順其自然囉，因為有啲朋友都會話介紹男仔我認識，不過我話唔使，本身好驚。大家見到我而家咁強悍，其實係怕咗，因為之前都好似有好多緋聞，當然有啲係真，有啲係假。」樂瞳曾經與林峯御用音樂監製鄧智偉傳過緋聞，那段情是真還是假？聽到鄧智偉個名，樂瞳笑得靦腆，「呢樣嘢就讓一切隨風啦，離開TVB之後，大家都無再聯絡。」樂瞳的答案，除了間接承認與鄧智偉過往有過一段情，更透露了二人「再見不是朋友」的狀況。採訪：肥A
攝錄：余一樂
Hair：Jay @ Hair Festival Walk
Outfit：MZJJ
Venue：Amelia @ Habour City
----------------------------
ChannelNEXT人民學堂：識法大講堂
曾志豪X劉偉聰 同你拆解「港版国安法」
立即收看
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|