【新增回應】
麥德羅確診武漢肺炎後，與他緊密接觸的好友劉少君亦不幸中招，二人已先後於前日和昨日康復出院，兩個好兄弟今日就急不及待相約到酒樓嘆茶見面，慶祝齊齊康復，麥德羅還表示：「好耐冇飲過茶啦，今日同我老友記互相問好，好似生離死別咁。」
不過，對於麥德羅與劉少君康復後即孖住到酒樓飲茶，網民全都一面倒鬧爆喪插，狠批二人行為自私自利四出播毒，未有為他人着想，「2人齊播毒，積吓陰德喇」、「過兩日又送返入去，真係仲飲茶，害得人少」、「有冇搞錯！即刻去公眾地方吹水！為己為人都應該在家休息有冇腦㗎」、「害人害物」、「一好番又出街，祝早日瀨多次」、「一出醫院門口又去闖鬼門關」、「好番仲即刻去人多地方，對人對己都笨X」、「咁快走出來播毒。唔係呀？」、「好快又中，入方艙醫院！」、「可否開名邊間洒樓，大眾安全考慮！」、「好返都有機會復發咁快走出嚟周圍走，仲要去許多老人家去嘅酒樓，離譜！」更有不少網民鬧爆劉少君口罩隨處放，及麥德羅拉低口罩進食極不衞生。
對於被網民喪插康復出院即孖住飲茶，劉少君回應《蘋果》說：「因為我哋冇見成兩個禮拜，啱啱今日又係第一日（麥德羅康復出院），我哋都聚咗一個小時啫，我哋已經分咗手，各自返屋企㗎喇。」對被網民鬧爆自私有何睇法？劉少君說：「咁都唔係嘅，你話畀大家聽，我哋只係分享個過程，知道我哋要點樣更加衞生啲。」會否減少外出？劉少君說：「會㗎會㗎，但唔係唔出街，係點樣康復最緊要。」
至於麥德羅就回應：「健康茶聚，合法的2人一圍，互相慰問，大家都好返了。」對於被網民鬧爆自私，麥德羅表示：「我哋有抗體，唔會播毒，唔通全港好番嘅人都播毒？請大家評評理。」他表示會好好休息：「做自己鍾意做嘅嘢，最緊要唔好影響到人哋。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|