熱爆娛樂: 【鍵盤戰士】曹永廉衰多口害翠如變藍返廠錄節目縮沙唔蒲頭 #曹永廉 #黃翠如

2020年8月18日星期二

【鍵盤戰士】曹永廉衰多口害翠如變藍返廠錄節目縮沙唔蒲頭 #曹永廉 #黃翠如

「如果XX想興風作浪，就讓暴風雨來得更猛烈些吧！」中國外交部如是說。可能藍絲們睇得愛國新聞多，潛移默化跟足國家路線，要滿城風雨先安樂。

「藍絲Icon」曹永廉（Forever Cheap ）噚日自告奮勇，喺FB嘅藍絲聚腳地「Save HK」出口術，拍晒心口向一眾藍絲澄清，老友蕭正楠嘅老婆黃翠如「不是黃屍」，更以「自己友」形容朋友妻，成個藍絲認證送上門，上演一幕「藍袍加身」。

要知道，黃翠如與蕭正楠係典型香港藝人，寧靜不表態，以圖避過政治話題上身，最終自己唔講，但就俾老友供咗出嚟，令黃翠如變成「藍翠如」，IG亦遭洗版。不過你有你認證，在一遍藍翠如聲浪之中，仍然見到有小粉紅湧入留言：「賣國賊的戲堅決罷看。」令黃翠如兩邊不是人。

Forever Cheap 今日要為TVB錄影金曲節目，原本有機會再替朋友妻解釋，不過無論在節目錄影前後，佢都冇出嚟見傳媒，做完節目就極速鬆人。另外兩位節目主持譚嘉儀及薛家燕就話Forever Cheap有到，但唔知點解相都唔影張，家燕姐就估可能同打風有關：「係咪打風趕住走呀？哈哈，我哋嚟嘅時候個個都淋濕晒。」

早前新城電台有人確診武漢肺炎，家燕姐為安全計，暫停錄影節目，今日係佢復工後第３次主持節目，防護措施一樣咁嚴謹：「我哋拍嘅時候個個都要戴口罩，唱歌就冇辦法得戴啦。但我有朋友送咗支消毒殺菌液畀我，我就噴晒成個台先上去。」另外，譚嘉儀上星期四（13日）生日，獲家姐親手整蛋糕同玻璃燈，又住咗一晚酒店影相、食嘢relax，講到之前喺節目入面下巴忽然變尖，佢話都有睇返，但唔覺同以前有大分別，可能同做開運動、拍攝角度有關。