前小虎隊成員林利縱橫演藝圈37年，在中港台都好吃得開，但大前年不幸患上大腸癌，被迫減少工作，以健康為由先後跟無綫和邵氏提早解約，回復自由身。
林利個性硬朗，強調自己「唔怕死」，但因手術後沒有好好休養，而是繼續登台、拍劇集《鐵探》和《殺手》，令元氣大傷。「以為自己好叻，但原來要好似女人生完仔咁坐月，唞返兩、三個月，但我冇，拍《殺手》好多打鬥戲，真係辛苦到暈低不醒人事，兩次送入醫院。因為撻抵頭受傷，腦震盪可大可小。」
離開無綫，健康是一個解約的理由，原來背後還有一個隱藏原因，「其實拍劇我唔驚，但無綫嗰種形態我麻麻地」。林利覺得無綫就像古代的皇帝，在城牆裏面工作，似被軍伐式控制，令他很不自在。他皺着眉頭說：「如果溫情係10分，佢（無綫）得1分，係冇溫情。無綫嘅拍攝手法同人與人之間嗰個感覺唔係咁舒服，你喺度打工，冇話邊個好，邊個唔好，總之每個月咁多錢。但台灣唔同，全部外包（判），電視台唔養人，製作費反而大咗，演員又舒服，起碼出外景有凳坐，飯又多啲選擇。我諗全世界得返無綫係咁，因為我去過好多地方拍戲，導演、劇務都（對我）哥前哥後，因為係外包，大家都想呢單做得好啲，有下一次。」
林利感慨無綫要養住幾百人，難免顧此失彼，他續說：「因為我自細有癲癇症，所以唔會揸車，去到外景場地，唔使埋位時就行嚟行去，有地方就坐吓。我唔鍾意坐公司24座位小巴，覺得入面好冇安全感，但可能有啲人習慣咗，但喺外面嘅人再返去拍，就會有啲唔習慣。」他透露明年會拍攝由無綫和騰訊合拍的《黑社會》（暫名），他透露待遇和薪酬都相對提高，他笑說：「今次係騰訊搵我，以外援身份錢多咗，人哋又會尊敬你，差好多，位置成件事唔同晒，我唔係話無綫唔好，但好似好委屈，做咗咁耐。」
林利16歲便參加第一屆新秀歌唱大賽，同屆冠軍是梅艷芳，憑着一張俊臉，很快便被唱片公司提攜，與胡渭康、孫明光組成「小虎隊」，唱過《新紮師兄》主題曲《伴我啟航》及《忍著淚說Goodbye》而紅極一時，但其後發展未如理想，短短兩年便解散。他之後轉戰台灣，改名林立洋，從歌手變成電視劇男主角，進入演藝事業的高峯期。
在台灣發展亦非一帆風順，因為政局的變遷，有一段時間拍劇只能講閩南話，令林利成為失業大軍，為生計要轉型做導遊。之後台灣偶像劇興旺，林利又自嘆年紀大，角色戲份大不如前，一度患上抑鬱症，「試過食藥，但越食越衰，冇工作、冇理想、冇動力，當時諗，點解做演員成日咁被動，好辛苦。把心一橫搵份工，平時個個話幫我嘅朋友，到真係搵嘅時候就知係吹水『你識咩吖，又冇學歷、又冇經驗，你嚟幫我以為你拍戲』。」
從來不怕由低做起，林利最後找到一份高級餐廳侍應，他笑說：「我搵咗好多間都唔肯請，但嗰一間係日本人開，老細唔識我。」當時吸引不少傳媒追訪，讓他再度成為新聞人物，8個月間不斷有人找他轉行，最後選擇到連鎖健身中心工作，兩年間便成為公司話事人。但期間仍有兼職拍劇做「茄喱啡」，他解釋：「我要返工，只有周六日得閒。初初返工一個月賺4萬幾台幣（約1萬港元），但做臨記有8000台幣（約2千港元），做一日茄喱啡等如我一個星期人工，點解唔做？冇名架，陳隊長嗰啲，但佢哋好尊重我，乜都得得得，夠鐘就叫我走。」
53歲的林利經歷過很多，自細患有癲癇症、試過婚姻失敗、女友「走佬」，又曾患癌病，令他早已看化生死：「我覺得做人要更加自私，自私對自己好，時代唔同，不必為人拼搏，自己亦唔需要咁拼搏，因為早晚都係入土為安。」他去年決定再婚，迎娶比自己年輕近廿載的台灣女粉絲Erin，令他人生變得更踏實。雖然夫妻經常分隔兩地，但林利笑言不擔心嫩妻被人搶走：「我成日叫佢搵朋友出去玩，因為我成日唔喺佢身邊，佢有問我『驚唔驚』，我話驚咩，我話你肯都冇所謂，我都有人媾，哈。」林利一直很喜歡台灣，認為生活步調好適合自己，早前在台北市花約500萬港元購入1,800呎大屋，準備將來退休有個安樂窩。
採訪：嵐山
攝影：林賓尼
錄影：葉君海
場地提供：𤅘鐵板燒料理
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|
