2020年8月6日星期四

【出書啦】留家鑽研環球美食　少爺占IG教煮餸變「疫境廚神」 #少爺占 #甄子康

【出書啦】留家鑽研環球美食　少爺占IG教煮餸變「疫境廚神」

少爺占化身「疫境廚神」在IG教煮餸，最新一道菜式有「咖喱雜菜焗飯」。

本港第三波疫情嚴峻，政府日前勒令食肆晚市禁堂食，搞到抗疫期間人人變廚神！自2月初開始重拾鑊鏟的少爺占，大半年來都Keep住喺IG報告「食得夠占」之今晚食乜，由早期玩烘焙、搓湯丸、醃叉燒，到近期仲鑽研埋環球美食，不論日、韓、泰、台、上海菜……總之你講得出嘅都有，其製作過款式有蕨餅、韓式伴飯、煎蝦餅、台灣牛肉麵、擔擔麵等。

日式蕨餅：「咁樣我終於買咗蕨餅粉啦，然後我發現之前買木薯粉係廢嘅，呢次先係真實嘅日本味啊！大家千祈唔好再諗住搏下用木薯粉。」

韓式伴飯：「內子至愛，但係出親街食都有少少唔啱心水，例如想芽菜多啲，想要熟蛋，或者唔想食肉等等。於是我決定自己整。將烤麩用烤汁炒好取代肉，其材料炒熟加入韓國麻油，就做好呢個韓式拌飯。又可以擺靚食物嘅位，最鍾意！」

而最新一道菜式是「咖喱雜菜焗飯」，少爺占留言：「天氣無咁熱就可以做返啲Heavy嘢食啦。先做好個炒飯。（其實就咁蛋炒飯加兩滴鹽已經好好味）洋蔥、薯仔及紅蘿蔔切粒加水加咖喱磚。炒好雜菜。加埋一齊，面放上芝士，放入焗爐170度焗十分鐘。食就五分鐘。」每次他都會分享埋個簡單食譜，有興趣學煮嘢食嘅網友可以上少爺占IG偷吓師。