音樂人馮穎琪（Vicky）一向身兼多職，除創作人和音樂監製外，亦有自家音樂品牌及旗下歌手，最近Vicky有新動向，從日本清酒中得到啟發，發展成一個全新的音樂計劃，日前Vicky就到尖沙嘴接受《蘋果》訪問，談談這計劃的來龍去脈。
過去三年先後替黎曉陽、Nowhere Boys、鄧小巧及黃靖等構思音樂計劃，是時候也替自己安排一下，Vicky說︰「今次決定用清酒做主題，係因為呢幾年愛上咗佢，愛嘅程度甚至完成咗品酒課程，雖然係初階但真係好有興趣繼續行落去。」
跟其他酒類一樣，品嚐清酒同是講求香味、口感、層次和餘韻，而且和好友暢飲的過程亦令Vicky很是享受，所以才有新曲《清酒之約》︰「慢慢斟慢慢飲，大家傾吓偈，喺少少酒精影響下可以做返真正嘅自己。而家社會好多嘢可能好難面對，但係希望大家都有方法可以紓緩一下，抽少少時間畀自己稍為抽離，放鬆完就返去現實。」的確有人會用運動或打機去放鬆，而清酒就是Vicky的選擇。
除了製作新歌外，Vicky亦籌備11月底在西九文化區的演出︰「我習慣咗每幾年做一個小總結，回顧吓自己做過嘅作品，諗諗吓過去呢幾年都寫咗唔少歌畀其他歌手，所以想以一個全新嘅編曲去演繹。」雖然目前武漢肺炎疫情依然相當嚴重，但Vicky表示根本擔心不到太多︰「既然咁多嘢掌握唔到，咁不如做住先，暫時當有得開，咁籌備住先啦。」
除了學品酒，Vicky又透露還趁這段時間學習了頌缽和量子共振，全部屬心靈治療範疇。的確，現在我們的社會中充斥着無力感，既然很多事都控制不了或徒勞無功，倒不如先控制好自己身體，Vicky亦認同這點︰「既然我改變唔到社會發生咩事，又影響唔到疫情有咩發展，喺困難嘅情況下，唯一改變到就係我自己嘅身體，同時可以幫到人，希望喺無力感當中仲可以搵到少少自己方向。」
採訪：曹家誠
攝影：陳俊強
攝錄：廖達燊
場地︰Amelia@Harbour City
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|