47歲的森美，近年愛上皮包鐵，兩年內擁有四部電單車，現更索性棄用私家車代步，改為鐵騎上班。
這日森美在商台收工，駕著一輛價值十萬元的八十年代古董哈利離開，在返家之前，還駕著他心愛的哈利去尖東海旁兜番轉！
駕古董哈利，等如中佬騎住中佬，沒有風馳電掣，亦無左穿右插，全程安全駕駛，森美嫂睇到呢幕，應該好放心！
之後跟停泊在海旁的森美聊兩句，原來他的電單車牌考了十年之久，但等到十年後先做鐵騎士，他說:「以前仔細老婆嫩，萬一有乜事，成頭家邊個管。依家仔女都大，感受下自由自在感覺。唔知點解我好鍾意七、八十年代嘅嘢，可能嗰段時間嘅香港好靚同美好，想追回一個年代嘅回憶，所以鍾意揸古董哈利。」
對他而言，電單車牌唔難考，老婆嗰關先難搞！所以想出車，服務對象必以老婆為先。「本來佢都唔放心，直至佢發覺可以買餸之後就好放心。九龍城買餸成日遇上塞車，有次佢話:『你揸駕綿羊仔落去幫我買豆腐！』見我好快完成任務，自始之後佢就冇再煩我，因為佢發現揸電單車可以幫佢買餸。」一磚豆腐就過到關！
已經家有四架「玩具」，他還準備訂第五部，是「哈利」雙座位，可載老婆去兜風，天若有情呀！
「兩年內已經買咗四架車，第一架係練習車，只係萬幾蚊；然後就買咗呢一架，後來為咗方便買餸，就買咗一架偉士綿羊仔。」
至於入第五部電單車，老婆冇乍型咩？「因為呢款舊車，保值潛力比較好，我就係用呢種方法去氹太太，我話手袋都會跌價，但電單車真係唔會跌價，例如買入價十萬，呢類車駕駛兩三年後仍然值十萬，甚至有時會升值一兩萬。」
「而且我每次買，都係睇我接到幾多個外快job，每個job有餘錢淨，我先可以買。不過依家經濟唔好，無乜job，想再買都唔得，我擁有嗰幾部，加埋準備運到香港嗰部，都係疫情前買落。所以唔好以為我大使，我好慳家架！全香港都知道，講到精明消費，除咗嘟姐，之後就輪到我，哈哈！」
開枱有麻雀腳，玩車都有車腳，圈中志道合，就有這兩位。森美:「張繼聰，仲有張振朗，佢都係畀張繼聰導佢玩。」
三個男人，每星期約埋鍊返轉！「星期日朝早，大約六、七點大家就會起身，然後約個地點，等齊人就出車，一般從九龍出發到元朗、大埔兜一圈。我哋係朝早灰姑娘，中午十二點前全部都需要交人，所以一句:『夠鐘交人』，大家就會好乖，返屋企交人。」
現在疫情下，造就好多鐵騎士，轉做外賣仔搵食。森美竟然都體驗過。「係呀，我上星期都跟過朋友送貨。當時我打電話俾朋友問佢喺邊？然後佢話出緊車送外賣，我同佢互傳短訊唔夠三句，佢話已經賺咗百五蚊。我話有冇搞錯？個幾鐘只係傳咗三個短訊，就已經賺咗百五蚊，我坐喺屋企零收入，所以想跟住佢了解一下。我真係跟住佢，喺佢嗰區兜咗一個圈，都幾開心嘅。」
大家放心，森美唔係爭飯食，佢去體驗，只係為咗呢樣嘢！
「我構思緊一個關於香港人駕駛電單車嘅故事，代表住香港其中一段時期。當然有一部份好似我咁，屬於悠閒性質，但有啲真係為搵食，
好辛苦。呢個係一個幾好嘅題材，可能之後拍成網上電影，或廣播劇。」
----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|