健康惹揣測
同吳孟達喺《新烏龍院》合作過嘅釋小龍，日前Post出同達哥過中秋嘅合照，立即喚起網民舊時睇《新烏龍院》嘅回憶，同時感嘆：「小龍大個仔喇，老夫子亦都老喇。」唔只老，相中達哥塊面瘦晒，面色亦顯蒼白，曾因心臟衰竭入ICU執返條命嘅佢，不禁令人擔心現時身體狀況。
- 釋小龍Post出同達哥過中秋嘅合照，但達哥面色顯蒼白，令人擔心他身體情況。
單拖超市入貨
一張瘦相，即時引起外界關心達哥健康狀況！不過早排本刊就發現68歲嘅達哥單拖去超市入貨，當時標誌性肚腩仔歸咗位，雖然對比昔日，依家嘅身形確係清減咗，但佢推住架購物車左穿右插健步如飛，身體應該無乜大礙。
曾心臟衰竭兼有糖尿
至於達哥面色係咪好似張合照咁又瘦又蒼白，戴咗口罩睇唔到，但係佢2014年曾因為心臟衰竭入過ICU，甚至數度傳出烏龍死訊，之後捱足一年暴瘦30磅，身形足足細咗幾個碼。話晒死過翻生，身體呢家嘢宜慢慢調理，急唔嚟。何況，佢近年又有糖尿病！佢曾向本刊透露：「我有糖尿病，年幾兩年了，依家主要靠西藥控制住。控制得幾好，去到呢個年紀，三高應該有嘅都將會有，唔應該有的都有，自己小心啲囉！」
嚴控飲食
本刊曾見佢下午茶都係食下粥清清淡淡就算，唔敢油膩。「食嘢七成飽，澱粉盡量少食，幾乎夜晚都唔食飯」係佢依家嘅養生規矩，唔似得以前大魚大肉又煙又酒相當放縱。達哥話：「依家生活都係咁啦，求其平平靜靜。乜嘢都食過，樣樣都荒唐過，依家乖乖地。知善而後得定，知道唔啱、知道條路不對，就願意定性，定而後能靜，靜而後能安，希望食碗安樂茶飯，冇嘢要求。」
過往荒唐度日
除咗飲食放縱，達哥曾向本刊坦白，年輕時有唔少壞習慣，可謂「嫖賭飲蕩」樣樣齊：「早喺七八、七九年，我同鄭少秋嘅《楚留香》，嚴格嚟講我係第二男主角，喺星馬尤其台灣好受歡迎，同而家周杰倫無分別，但亦因為咁自己膨脹咗，以為自己好叻好巴閉，登台拍電影，結果嫖賭飲蕩咩都齊。」身體欠佳拒星仔邀拍戲
年紀大，唔再荒唐度日，健康亦不復當年勇，莫講話壞習慣，達哥話想搞笑都要問過個心，唔可以太激動，所以早幾年有戲搵佢拍都唔做，更因此錯過咗觀眾期待以久嘅佢同周星馳再度合作。「《美人魚》佢有搵我拍，但嗰時身體唔好，拒絕咗。費事，演咗對唔住自己，更對唔住觀眾，觀眾唔係想睇你有氣無力嘅表演，真係需要好大energy。如果我當年做到《美人魚》，我可能有個想法，『星仔我唔收錢得唔得呀？分紅得唔得呀？甚至我夾二百三百五百萬，你肯就得！』我知道實賺，但估唔到賺得咁緊要，三十幾億呀大佬，我諗住十億都唔得了，十億分返出嚟都幾好喎。」錯過咗聚首嘅機會，達哥表示同星仔而家嘅關係，「感覺好似有啲老死不相往來」。返大陸賺人仔
Anyway，達哥身體狀況應該ok，所以佢最近已經返咗大陸拍電影、拍廣告，本刊致電亦都聯絡唔到佢喇。但記得佢早前現身公開講過，話受武漢肺炎疫情影響，大陸嘅工作推遲咗半年以上，留喺香港唯有做下公園阿伯，散散步曬曬太陽，有需要就為屋企上糧順便行下街，最緊要保持身體健康。----------------------------
《噴火30年壹驚艷 性感女星典藏集》特刊現已出版，各大書報攤及便利店有售，每本港幣九十八元正。
當年鏡頭下的李嘉欣、黎姿、朱茵、舒淇、邱淑貞等三十位經典港姐、性感女星，一一復刻，艷壓全港。
了解更多
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|
