入行13年，楊詩敏（蝦頭）在鏡頭前永遠予人開心、甚至有點癲喪的感覺，若非她曾於受訪時真情流露爆喊，公開有情緒問題、一度感到自我價值很低，觀眾也很難想像，笑臉背後有另一個她；慶幸在這個被疫情籠罩着的2020年，蝦頭仍然正能量滿滿，不但擊退負面情緒，更認為疫情雖然影響生活，但也為她帶來不少得着。不過，為了減少感染風險，蝦頭工作以外的時間大多會「宅」在家，陪伴母親及愛貓愛犬，又或者睡在屋前小花園的吊床，簡簡單單享受悠閒下午；日前《蘋果》登門探訪她，難得有客人，蝦頭即時戲癮大發，在鏡頭前整蠱作怪一番，才抱着愛犬忌廉仔，坐定定接受「自己」訪問。
下月29日是蝦頭「44+1」，講到今年的生日願望，蝦頭裝認真說：「45歲已經過咗人生一半，再多一個45歲就已經係90歲，我諗我都有咁長命嘅！如果要講生日願望，一定要做啲人生未做過嘅嘢，例如結婚吖，未做過，當試吓新嘢囉，但係男人都無喎，唔知幾時可以達成，所以今年嘅生日願望，就係今年願望可以達成！」
回顧2020年的得與失，蝦頭以「絕對唔簡單」、「唔少嘢」來形容，但同時指這個影響全球的疫症，令她有時間停下來思考人生。蝦頭表示：「因為冇嘢做，就係咁諗諗吓，諗到啲大計，係以前做演員未經歷過嘅。以前我係好乖喺度等機會，而家就自己去創造，嚟緊會創造自己品牌，可能係影片、舞台劇、工作坊或者產品，一個好得意嘅計劃進行中，亦因為萌生咗呢個念頭，吸引咗好多人幫自己，係好神奇嘅一年，所以2020年，多謝你！」
接着談到過去10年最大的改變，蝦頭說：「以前無咁識愛錫自己，好多衰嘅習慣，食得多又成日飲酒，唔開心就狂食或者借酒消愁，直至透過唔同角色，更加認識自己同生活，明白咗要好好愛錫自己，搵返自己同建立生活，成個人都靚晒，自信返晒嚟，無論遇到乜嘢困難，都識得面對唔再怕。」
至於，疫情過後最想做的事，蝦頭說一定是飛去法國，因為她早於疫情前，已身在當地修讀演藝課程，最後學校受疫情影響要關閉，她才飛返香港，因此她希望可以重返校園，探望一眾老師。說到香港最近掀起移民潮，她又有否想過離開？蝦頭指自己會繼續留守香港，因為好愛這個地方，「我希望用自己擅長嘅嘢貢獻返呢個地方，想大家遇到難關嘅時候，可以一齊面對，盡量用自己演戲細胞，帶返啲好嘅能量畀香港人，同大家一齊邁進新生活，相信難關一定會過去，呢個時候就準備好自己。」
說到「人生大事」，在愛情路上走過不少崎嶇路的蝦頭，仍然相信愛情？她說最近沒有想感情事，但相信會和她並肩作戰的人一定會出現，而擇偶條件是對方要跟她一樣，想創造生活，二人可以瘋狂地玩及做想做的事，最重要是對方會支持她。最後，問蝦頭如果人生中能剔除一樣東西，換取其他想要的，她會放棄甚麼？蝦頭第一時間表示要剔走今次疫症，換回大家的健康。果然大愛！
採訪：鄉奈仁
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|